Այսօր Կոռուպցիայի դեմ պետությունների խումբ (GRECO)-ն՝ Եվրոպայի խորհրդի հակակոռուպցիոն մարմինը, հրապարակել է իր տարեկան զեկույցը, որն ընդգրկում է մինչև 2025 թվականի դեկտեմբերի 31-ն ընկած ժամանակահատվածը։
Հայաստանը այն երկրների շարքում է, որոնց վերաբերյալ 2025 թվականի դեկտեմբերի 31-ի դրությամբ, GRECO-ն արդեն ավարտել էր խորհրդարանականների, դատավորների և դատախազների շրջանում կոռուպցիայի կանխարգելման վերաբերյալ իր հանձնարարականների կատարման մշտադիտարկումը։
Ներկայումս Հայաստանը գտնվում է GRECO-ի մշտադիտարկման ներքո 5-րդ թեմատիկ գնահատման շրջանակում՝ «Կոռուպցիայի կանխարգելումը և բարեվարքության խթանումը կենտրոնական կառավարությունում (բարձրագույն գործադիր գործառույթներ) և իրավապահ մարմիններում» թեմայով։
2026 թվականի հունիսին կայացած իր լիագումար նիստում GRECO-ն նաև ընդունել է Հայաստանի, Վրաստանի և Իտալիայի վերաբերյալ հետագա կատարման զեկույցները։
Այն արձանագրել է, որ հաջորդ 18 ամիսների ընթացքում անհրաժեշտ է ապահովել լրացուցիչ առաջընթաց՝ հանձնարարականների կատարման բավարար մակարդակի հասնելու համար, և սահմանել է 2027 թվականի դեկտեմբերի 31-ը որպես վերջնաժամկետ, մինչև որը համապատասխան երկրների պատվիրակությունների ղեկավարները պետք է ներկայացնեն իրավիճակային զեկույց՝ Հինգերորդ գնահատման փուլի հանձնարարականների կատարման նպատակով ձեռնարկված լրացուցիչ միջոցառումների վերաբերյալ։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: