Թուրքիայի արտաքին գործերի նախարարությունը հանդես է եկել հայտարարությամբ՝ Իսրայելի կառավարության կողմից Հայոց ցեղասպանությունը պաշտոնապես ճանաչելու վերաբերյալ նախագծին հավանություն տալու վերաբերյալ։ Հայոց ցեղասպանությունը հայտարարության մեջ անվանված է «1915 թվականի իրադարձություններ»։
«Իսրայելի կառավարությունը, որն ամբողջ աշխարհի աչքի առաջ համակարգված հալածանքներ է իրականացնում պաղեստինցի ժողովրդի նկատմամբ և ներկայումս գտնվում է Արդարադատության միջազգային դատարանում՝ Գազայի բնակիչների դեմ ցեղասպանության հանցագործության գործով, փորձում է թաքցնել սեփական հանցագործությունները 1915 թվականի իրադարձությունների վերաբերյալ ընդունած քաղաքական որոշմամբ։
Այս չարամիտ փորձը, որն անտեսում է իրավական և պատմական փաստերը, բացահայտում է Նեթանյահուի և նրա հանցակիցների դժվարին վիճակը, որոնց նկատմամբ ձերբակալման օրդերներ են տրվել Միջազգային քրեական դատարանի կողմից պաղեստինցիների դեմ կատարված հանցագործությունների վերաբերյալ անցկացվող հետաքննության համատեքստում։
Թուրքիան կշարունակի վճռականորեն աշխատել տարածաշրջանում Իսրայելի ծավալապաշտական և անկայունացնող քաղաքականության դադարեցման և Նեթանյահուի կառավարությանը օրենքի համաձայն պատասխանատվության ենթարկելու համար՝ քաղաքացիական բնակչության, մասնավորապես՝ պաղեստինցի ժողովրդի դեմ կատարված հանցագործությունների համար»։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: