Հրաձիգ Դավիթ Խաչատրյանը դարձել է Եվրոպայի չեմպիոն՝ սահմանելով նոր ռեկորդ (ՖՈՏՈ)

ԵՐԵՎԱՆ, 6 փետրվարի․/Նովոստի–Արմենիա/. Հայաստանի հրաձգության պատանեկան հավաքականի անդամ Դավիթ Խաչատրյանը ոսկե մեդալ է նվաճել Բուլղարիայի Բուրգաս քաղաքում անցկացված Եվրոպայի Մ16 տարեկանների առաջնությունում:

Այս մասին հայտնում են ԿԳՄՍ նախարարությունից: 

Խաչատրյանը հանդես է եկել 10մ օդամղիչ հրացան մրցաձևում և հաղթողի կոչմանն արժանացել է 414,7 միավորով: Այս տարիքային խմբում Խաչատրյանը գերազանցել է նաև Եվրոպայի ռեկորդը։ 

Մ16 տարեկանների պայքարում Հայաստանի մյուս ներկայացուցիչ Արտակ Սիմոնյանը զբաղեցրել է 13-րդ տեղը: Մ18 տարեկանների պայքարում Հայկ Սարգսյանը գրավել է 9-րդ, իսկ Արմեն Գևորգյանը՝ 25-րդ հորիզոնականը: 

Նշենք, որ Հայաստանի հավաքականը մրցավայր է մեկնել հավաքականի ավագ մարզիչ Անդրանիկ Այվազյանի և մարզիչ Նորա Նիկողոսյանի գլխավորությամբ։