«Դուք ասում էք՝ Գագիկ Ծառուկյանի, Սամվել Կարապետյանի, Ռոբերտ Քոչարյանի տղաները չեն ծառայել, իսկ դուք ծառայե՞լ եք»,- այսօր այս հարցերը Քանաքեռ-Զեյթուն վարչական շրջանում քարոզարշավի ժամանակ վարչապետ Նիկոլ Փաշինյանին ուղղեց մի տղա:
«Ես չեմ ծառայել, որովհետեւ իմ երկու եղբայրները ծառայած են եղել եւ 1991 թվականին այդպիսի օրենք է եղել, որ երրորդ զավակը չի գնում բանակ: Այսինքն՝ օրենքով սահմանված կարգով պետությունն ինձ ազատել է բանակից: Բայց իմ տղան ծառայել է»,- արդարացավ Փաշինյանը:
«Իսկ ինչ իրավունքով եք մեղադրում նրանց, եթե նույնիսկ չեք ծառայել»,- շարունակեց տղան: Ի պատասխան Փաշինյանն ասաց. «Որովհետեւ ես օրենքով սահմանված կարգով եմ ազատվել, ոչ թե ես չեմ գնացել: Իսկ իրենց զավակները տարբեր կեղծ պատճառաբանություններով են ազատվել»:
Տղան հարցրեց նաեւ՝ ինչո՞ւ է ժողովրդին ու տարբեր քաղաքական գործիչներին Փաշինյանը վիրավորում, ի պատասխան Փաշինյանն ասաց՝ ժողովրդին ինքը չի կարող վիրավորել, որովհետեւ ժողովուրդն իր գործատուն է, իր տերն է:
«Ես շատ եմ լուրեր նայում, հանգիստ եղեք»,- Փաշինյանի ասածին չհավատալով՝ պատասխանեց տղան: Փաշինյանը տղային փորձեց համոզել, որ նրան սխալ լուրեր են ցույց տալիս:
«Ձեր ալիքով սխալ լուրեր են ցույց տալիս, հասկացա»,- արձագանքեց տղան ու հեռացավ:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: