Ռուսական կողմը Հայաստանին առաջարկել է տարբեր տարբերակներ՝ Հայկական ԱԷԿ-ի փակվելուց հետո հզորությունները փոխարինելու համար, ինչպես նաև տարբեր սխեմաներ՝ ապագա ատոմակայանի բիզնեսում և շահագործման մեջ մասնակցության վերաբերյալ, սակայն առայժմ պատասխան չի ստացվել։ Այս մասին «Ռոսատոմ»-ի գլխավոր տնօրեն Ալեքսեյ Լիխաչովը պատմել է «Известия»-ին տված հարցազրույցում։
«Մենք մեր հայ գործընկերներին սեղանին ենք դրել տարբեր լուծումներ։ Դրանք և՛ միջին հզորության բլոկներ են, և՛ գիգավատտային մակարդակի բլոկներ։ Մենք պատրաստ ենք ավելցուկների դեպքում էլեկտրաէներգիայի մի մասը գնել և արտահանել հարևան երկրներ, ակտիվ մասնակցել բիզնեսին, ատոմային էներգաբլոկի շահագործմանը», – ասել է «Ռոսատոմ»-ի ղեկավարը։
Միևնույն ժամանակ նա նշել է, որ Ռուսաստանը դեռևս պատասխան չի ստացել հայկական կողմից՝ Մեծամորի ԱԷԿ-ում ատոմային էներգաբլոկի հետագա շահագործման հարցի վերաբերյալ։ «Այստեղ գնդակն ամբողջությամբ այժմ հայկական թիմի կողմում է, և շատ չէի ուզենա, որ այս հարցը տեղափոխվեր քաղաքական քննարկումների և տարատեսակ անձնական համակրանքների ու հակակրանքների հարթություն։ Ինչո՞ւ։ Նայեք, Հայաստանը Կովկասում միակ երկիրն է, որը հպարտորեն կրում է ատոմային էներգետիկայի դրոշը։ Եվ կորցնել այդ կարողությունը, այսինքն՝ ընդհանրապես կորցնել ատոմային էներգետիկան, իմ կարծիքով, բացարձակապես անտնտեսվարական կլիներ», – նշել է նա։
Հայկական ԱԷԿ-ը ատոմակայան է, որը կառուցվել է դեռ խորհրդային շրջանում՝ Մեծամոր քաղաքից ոչ հեռու, Երևանից 30 կմ հեռավորության վրա։ Այն բաղկացած է երկու էներգաբլոկից։ Երկրորդի արդիականացումն իրականացրել է «Ռոսատոմ Սերվիս»-ը, որից հետո հայկական վերահսկող մարմինը դրա շահագործման լիցենզիա է տվել մինչև 2026 թվականը։ Ներկայումս ատոմակայանում աշխատանքներն ընթանում են ըստ ծրագրի․ ռուսական կողմը ապահովում է սպասարկումը և զբաղվում վառելիքի մատակարարմամբ։ Սպասվում է կրկնակի երկարաձգման ստորագրում մինչև 2036 թվականը։
News.am