Հայաստանի՝ ԵԱՏՄ-ի և ԵՄ-ի միջև ընտրության հարցը «շատ դժվար է»։ Այս մասին ՏԱՍՍ-ին ասել է Ռուսաստանի փոխվարչապետ Ալեքսեյ Օվերչուկը։
«Հայաստանում կան ուժեր, որոնք պաշտպանում են Եվրասիական տնտեսական միության հետ կապերի պահպանումը։ Կան ուժեր, որոնք ձգտում են երկիրը ներգրավել Եվրամիության մեջ։ Մենք, իհարկե, ցանկանում ենք տեսնել Հայաստանը Եվրասիական տնտեսական միությունում», – ընդգծել է նա։
«Ռուսաստանի ջանքերը հանգեցրել են Հայաստանի և Ադրբեջանի միջև հարաբերությունների զարգացմանը: Երկու երկրների միջև առևտուր է սկսվել: Սա լիովին նորմալ գործընթաց է, ինչից մենք շատ գոհ ենք: Հայաստանի տրանսպորտային համակարգը մասամբ ապաշրջափակվել է: Այսօր ռուսական հացահատիկն ու պարարտանյութը երկաթուղով Հայաստան են հասնում Ադրբեջանի և Վրաստանի միջոցով: Ռուսաստանը նույնպես մասնակցում է ապաշրջափակման գործընթացին: Միևնույն ժամանակ, մենք տեսնում ենք, որ Հայաստանում կան ուժեր, որոնք պաշտպանում են Եվրամիության հետ մերձեցումը: Նրանք օրենք են ընդունել անցյալ տարվա ապրիլին: Այս օրենքը հստակ ցույց է տալիս Եվրամիությանը միանալու ցանկությունը:
«Ներկայիս աշխարհաքաղաքական իրավիճակում, երբ Եվրամիությունը տնտեսական ինտեգրման ասոցիացիայից վերածվում է ռազմաքաղաքական միության, երբ ԵՄ-ն ռազմականացվում է, և ռազմականացվում է Ռուսաստանի դեմ, հայերը պետք է հասկանան նման ընտրության հետևանքները», – նշել է Օվերչուկը: