Իրանի արտաքին գործերի նախարար Աբբաս Արաղչին հայտարարել է, որ Միացյալ Նահանգները ռազմական գործողություններ է ընտրում, երբ դիվանագիտությունը հնարավոր է՝ հավելելով, որ իրանցիները երբեք չեն զիջի ճնշմանը։ Այս մասին Արաղչին հայտարարություն է տարածել X-ում։
«Ամեն անգամ, երբ սեղանին դիվանագիտական լուծում է դրվում, ԱՄՆ-ն անխոհեմ ռազմական արկածախնդրության է դիմում։ Սա կոպիտ ճնշման մարտավարությո՞ւն է, թե՞ սփոյլերի արդյունք, որը կրկին ԱՄՆ նախագահին խաբեությամբ ներքաշում է մեկ այլ ճահճի մեջ։ Անկախ պատճառներից, արդյունքը նույնն է. իրանցիները երբեք չեն զիջում ճնշմանը», – նշել է նա։
Իրանի հրթիռային կարողությունների վերաբերյալ Արաղչին նշել է, որ երկրի հրթիռային պաշարները և արձակման հզորությունը մեծացել են և չեն կազմում 75%` համեմատած մինչև փետրվարի 28-ը եղած մակարդակի հետ, երբ ԱՄՆ-ն և Իսրայելը պատերազմ սանձազերծեցին Իրանի դեմ։
«Ճիշտ թիվն է 120%։ Ինչ վերաբերում է մեր ժողովրդին պաշտպանելու մեր պատրաստակամությանը, ապա այն կազմում է 1000%», – հավելել է Արաղչին։
Նա իր գրառմանը կցել է ԱՄՆ հետախուզության գնահատումների մասին վերլուծություն, ըստ որի՝ Իրանի մոտ մնացել է նախքան պատերազմն ունեցած շարժական կայանքների 75%-ը և հրթիռների մոտ 70%-ը։