Ապրիլի 21-ին կայացել է «Կրթվելը նորաձև է» շարժման հերթական բանախոսությունը, որին ներկա է եղել շուրջ 160 մասնակից։ Այս մասին հայտնում է «Իմ քայլը» հիմնադրամը։
«Հանդիպումը մեկնարկեց «Իմ քայլը» հիմնադրամի փոխտնօրեն Թալին Թօփալաքեանի ողջույնի խոսքով, ով ներկայացրեց շարժման նպատակները՝ ընդգծելով շարունակական կրթության կարևորությունը և նման հարթակների դերը զարգացող, ինքնակրթվող հասարակություն ձևավորելու գործում։
Ինչպես միշտ, հանդիպումը մեկնարկեց ակադեմիական հիմնով՝ Gaudeamus igitur-ով, որից հետո բեմ հրավիրվեց օրվա բանախոսը՝ «ԼՈՖԹ» կենտրոնների գլխավոր տնօրեն, գործարար Արևիկ Համբարձումյանը։
Բանախոսությունը տպավորեց ներկաներին իր անկեղծությամբ և պարզությամբ։ Այն նվիրված էր ժամանակակից կնոջ բազմաշերտ դերին՝ որպես առաջնորդ, մայր և մասնագետ, և անդրադառնում էր այդ դերերի միջև հավասարակշռություն գտնելու մարտահրավերին։ Բանախոսությունը խոր ազդեցություն ունեցավ մասնակիցների վրա և ներկա կանանցից շատերը գտան իրենց հույզերն ու ապրումները Արևիկի խոսքերում:
Հանդիպման ընթացքում տեղի ունեցավ նաև երաժշտական դադար՝ «Երևանի ձայներ» կանանց կամերային երգչախմբի մասնակցությամբ, որին հաջորդեց ակտիվ հարցուպատասխանի հատվածը։ Դրա ընթացքում մասնակիցները համարձակորեն բարձրաձայնեցին իրենց կարծիքներն ու մտահոգող հարցերը` նպաստելով անկեղծ և արդյունավետ քննարկմանը:
Քննարկվեցին կարևոր թեմաներ՝ «ամեն ինչ հասցնելու» լարվածությունը գիտակցված ընտրությամբ փոխարինելու, սեփական էներգիան վերականգնվող ռեսուրս դարձնելու և անձնական ու մասնագիտական կյանքի ներդաշնակությունը պահպանելու շուրջ։
«Կրթվելը նորաձև է» հարթակը վաղուց արդեն միավորում է տարբեր ոլորտների առաջատար մասնագետների, ովքեր հանդես են գալիս բազմաբովանդակ և արդիական թեմաներով բանախոսություններով և կիսվում միմյանց հետ ամենաթանկով` գիտելիքով և փորձով»,- ասվում է հաղորդագրության մեջ։
Դիտումների քանակ3