Մերձավանում այսօր Փարաքարի սպանված համայնքապետ Վալոդյա Գրիգորյանի ընտանիքի անդամներն ու մերձավորները բողոքի ակցիա են իրականացրել սպանության մեջ մեղադրվողի տան դիմաց՝ պահանջելով այդ ընտանիքին հեռացնել համայնքից:
Նշենք, որ մեղադրյալի տունը hսկում էին տասնյակ ոստիկաններ:
«Դուք ուրիշ առաքելություն չունե՞ք անելու այս երկրի համար: Մարդասպանին ումի՞ց եք պահում: Դրա համա՞ր եք այդքան տարի սովորել ու աշխատել: Մի հատ անալիզ արեք ձեր մեջ՝ արդյո՞ք արժե այս մարդասպանի դուռը կանգնեք: Գիտեմ՝ ձեզ փողն է պետք, բայց մի քիչ էլ մարդկային եղեք»,- դիմելով ոստիկաններին՝ ասաց Գրիգորյանի մայրը:
Նրա խոսքով, ամբողջ ձմեռ ոստիկանները հսկել են այդ տունը. «Ինչի՞ ես նկարում ինձ, տղա ջան, դու ինձ չե՞ս տեսել: Նկարի, չեմ ամաչում, դուք ամաչեք, որ մարդասպանին եք պահում»:
Գրիգորյանի այլ ազգականներ էլ նախատեցին ոստիկաններին. «Եթե նկարում եք, շատ ամոթ, է ծնողը էդպիսի տղա է մեծացրել ու կորցրել, դուք նկարելով եք զբաղված, էս ի՞նչ եք անում»:
«Մենք ասում ենք թող գնան Հայաստանի՞ց, ընդամենն ասում ենք՝ թող գնան համայնքից, ուրիշ տեղ ապրեն: Բայց ինչի՞, հինգ տուն այն կողմ եմ քնում, ո՞ր մի մայրը կարող է որդուն սպանողի տան կողքին հանգիստ քնել: Ձեր ղեկավարությունը թող հանի, ռադ անի դրանց, որ խուսափենք մնացած բաներից»:
Գրիգորյանի մայրը վրդովվեց, որ մեղադրյալի ընտանիքը նորից հետ է եկել, բայց ինչի են եկել. «Ես՝ որպես մայր, չեմ թողնելու, հանգիստ ապրեն: Դիտավորյալ են արել, դիտավորյալ են եկել: Թող դուրս գա մեկը այդ տնից, ներողություն խնդրի, ասի ՝կներեք; Թեեւ մեր կյանքում դրանից բան չի փոխվի»:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: