Ալեն Բերսեի ելույթը Եվրոպայի խորհրդին Հայաստանի անդամակցության 25-ամյակի կապակցությամբ միջոցառմանը
Բաժանորդագրվեք Zarkerak.am-ի տելեգրամ ալիքին։
Եվրոպայի խորհրդին Հայաստանի անդամակցության 25-ամյակի կապակցությամբ միջոցառում է կազմակերպվել ԵԽ կենտրոնակայանում։ Ելույթով հանդես են եկել ՀՀ ԱԳ նախարար Արարատ Միրզոյանը և ԵԽ Գլխավոր քարտուղար Ալեն Բերսեն։
«Հարգելի՛ գործընկերներ, ընծայաբերվող նվերները հիշեցում են այն բաների մասին, որոնք անփոփոխ են, հատկապես հիմա, երբ ամեն ինչ անորոշ է թվում, և երբ համաշխարհային կարգը փոխվում է մեր աչքերի առաջ։
Այս տարի Հայաստանը նշում է Եվրոպայի խորհրդին անդամակցության 25-ամյակը։ Այն նվիրաբերում է ութուկես դար առաջ գրված տեքստ՝ Մխիթար Գոշի «Դատաստանագրքի» մի հատվածի ձեռագիր վերարտադրության օրինակը։ Դրա առաջին տողերը զինաթափող են, մեջբերում եմ՝ «Արդարությունից սկսելը բնական է»:
Ութ դար անց այս միտքը դեռևս արմատական է թվում. արդարությունն այն է, ինչից սկսվել է մեր խաղաղության նախագիծը, և հենց դրա հիման վրա Եվրոպան պետք է նորից սկսի՝ չանտեսելով օրենքը և առաջին տեղում դնելով արդարությունը:
Ամբողջ Եվրոպայում այդ համոզմունքը կրկնվել է դարեր շարունակ՝ Ազատությունների մեծ խարտիայի, Մարդու և Քաղաքացու իրավունքների հռչակագրի և Երկրորդ համաշխարհային պատերազմից հետո՝ Մարդու իրավունքների եվրոպական կոնվենցիայի տեսքով։ Դրանցից յուրաքանչյուրը ժամանակին արդարությունն արտահայտել է բառերով։
Հայաստանն իր ձայնն է միացնում եվրոպական այս երկար շարունակվող իրավական խոսակցությանը։ Ընդամենը մի քանի ամիս առաջ վարչապետ Փաշինյանն այստեղ ասաց. «Եվրոպայի խորհուրդը մեր տունն է, որտեղ մենք հասցե ենք ստանում՝ որպես ժողովրդավարական պետություն: Տուն, որտեղ մարդը նպատակ է, ոչ թե միջոց»։
Եվ այդ խոսքերն ամրապնդվում են գործողություններով՝ բարեփոխումներ իրականացնելով և օրենքները համապատասխանեցնելով եվրոպական ընդհանուր չափանիշներին՝ կոռուպցիայի դեմ պայքարից մինչև ընտանեկան բռնության դեմ պայքար։
Քսանհինգ տարի անց, փոփոխվող աշխարհում, սա այն վայրն է, որտեղ մենք պաշտպանում ենք Հայաստանի, Հարավային Կովկասի և ամբողջ Եվրոպայի իրավունքները։ Պարո՛ն նախարար, շատ շնորհակալ եմ այս նվերի համար։ Այն իր տեղը կգտնի այստեղ՝ Եվրոպայի խորհրդում՝ Հայաստանի տանը, իր անփոխարինելի առաջին բառերով և իմաստով։
Արդարությունից սկսելը բնական է։ Շնորհակալությու՛ն, Հայաստան»,- նշել է ԵԽ գլխավոր քարտուղար Ալեն Բերսեն։