Ուկրաինայի նախագահ Վլադիմիր Զելենսկին հայտարարել է, որ գարնանային և ամառային ամիսները մարտահրավերներ են լինելու Ուկրաինայի համար, քանի որ Կիևը ճնշման է բախվելու ինչպես մարտադաշտում, այնպես էլ դիվանագիտական մակարդակով։ Զելենսկին լրագրողներին ասել է, որ Ուկրաինայի դաշնակիցները խնդրել են Կիևին կրճատել ռուսական նավթային ոլորտի դեմ հարձակումները, քանի որ համաշխարհային գները կտրուկ աճել են Իրանի հետ պատերազմի և Մերձավոր Արևելքում լարվածության սրման պատճառով, հաղորդում է Reuters-ը։
Նա, սակայն, չի նշել այն երկրների անունները, որոնք դիմել են նման խնդրանքով, գրում է BBC-ն։
Ըստ Զելենսկիի՝ եթե Ռուսաստանը ցանկանում է լիցքաթափել իրավիճակը, ապա պետք է դադարեցնի Ուկրաինայի էներգետիկ օբյեկտների վրա իր սեփական հարվածները և համաձայնի վերսկսել եռակողմ խաղաղության բանակցությունները Վաշինգտոնի միջնորդությամբ։ Նա ընդունել է, որ ԱՄՆ-ը ներկայում ավելի քիչ ժամանակ է հատկացնում Ուկրաինայում խաղաղության գործընթացին։
Ուկրաինայի նախագահը հիշեցրել է, որ այս ամռանն ԱՄՆ-ում սկսվում է միջանկյալ ընտրությունները փուլը։
«Այսինքն՝ այս գարուն-ամառ ժամանակահատվածը բավականին դժվար կլինի քաղաքական և դիվանագիտական առումով։ Կարող է ճնշում լինել Ուկրաինայի վրա։ Եվ ճնշում կլինի նաև մարտադաշտում։ Բայց մենք հասկանում ենք Ուկրաինայի ազգային շահերը և այն, ինչը կարող է երաշխավորել անվտանգությունը։ Ես կարծում եմ, որ մեզ համար շատ դժվար կլինի մինչև սեպտեմբեր։ Իմ կարծիքով՝ այս մարդիկ պատրաստ չեն պատերազմը դադարեցնել: Կա նաև հասարակության մի հատված, որը վատ կարձագանքի սրմանը»,- ասել է Ուկրաինայի նախագահը:
Նա կարծում է, որ կա երկու սցենար՝ հակամարտության սրացում և ապաէսկալացիա:
«Եվ շուտով կտեսնենք, թե որ սցենարն է ընտրում Պուտինը։ Եթե Ռուսաստանն ընտրի լարվածության թուլացումը, կարծում եմ՝ եռակողմ հանդիպում կլինի։ Եվ նրանք կփորձեն այն անցկացնել ապրիլին, մայիսին կամ հունիսին»,- ենթադրություն է հայտնել Զելենսկին։
Նա կրկին կոչ է արել՝ մեծացնել Ռուսաստանի վրա միջազգային ճնշումը, նաև հույս է հայտնել, որ Մերձավոր Արևելքում հակամարտության ընթացքում ժամանակավորապես մեղմացված ԱՄՆ պատժամիջոցները լիովին կվերականգնվեն։ Զելենսկին նաև ասել է, որ Ուկրաինան «նշանակալի առաջընթաց է գրանցել» վնասված «Դրուժբա» նավթամուղի վերականգնման գործում և այս գարնանը կավարտի վերանորոգումը։
«Մենք կավարտենք վերանորոգումը, քանի որ պայմանավորվել ենք։ Ես նրանց ասացի, որ կավարտենք այս գարնանը։ Այնտեղ արդեն շատ բան է արվել։ Իհարկե, վնասված ջրամբարներն արագ չեն կարող վերանորոգվել», – ասել է Զելենսկին։
«Դրուժբա» խողովակաշարով Սլովակիա և Հունգարիա ռուսական նավթի մատակարարումների դադարեցումը սրել է Բուդապեշտի և Կիևի միջև հակամարտությունը։ Հունգարիայի իշխանություններն արգելափակել են Ուկրաինային ԵՄ-ի կողմից նախկինում համաձայնեցված վարկը և ՌԴ-ի դեմ պատժամիջոցների 20-րդ փաթեթը՝ մեղադրելով Ուկրաինային խողովակաշարով մատակարարումները դիտավորյալ արգելափակելու մեջ։
Թարգմանությունը՝ Էմմա Չոբանյանի