ԱՄՆ Կոնգրեսի մի տասնյակ անդամներ պահանջեցին, որ Ադրբեջանն ազատ արձակի Բաքվում պահվող հայ պատանդներին և ապահովի Արցախի բնիկ բնակչության անվտանգ, հավաքական և պաշտպանված վերադարձը

Օրենսդիրները ANCA-ի ծրագրում շեշտադրում են Ադրբեջանի պատասխանատվությունը՝ նշելու Ադրբեջանի կողմից Արցախի ցեղասպանության երեք տարին

ԱՄՆ Կոնգրեսի մի տասնյակ անդամներ պահանջեցին, որ Ադրբեջանն ազատ արձակի Բաքվում պահվող հայ պատանդներին և ապահովի Արցախի բնիկ բնակչության անվտանգ, հավաքական և պաշտպանված վերադարձը, միանալով հայ ամերիկացի ակտիվիստներին, հոգևորականներին և միջազգային իրավաբան փորձագետներին Ամերիկայի հայ դատի կոմիտեի (ANCA) «Հաշվետվողականություն | 2026 – Արցախ. Արդարություն. Ազատություն. Վերադարձի իրավունք» ծրագրում։

Ծրագիրը նշանավորեց Ադրբեջանի կողմից Արցախի ցեղասպան էթնիկ զտումների երեք տարին և ամփոփեց երկօրյա ջատագովական աշխատանքը, որը կազմակերպել էին ANCA Արևելյան շրջանը, ANCA Արևմտյան շրջանը և ANCA Ազգային կենտրոնակայանը, և որի շրջանակում ավելի քան 30 նահանգներից 100-ից ավելի ակտիվիստներ այցելեցին ԱՄՆ Ներկայացուցիչների պալատի 435 և Սենատի 100 գրասենյակներից յուրաքանչյուրը։

Ծրագիրն ուղիղ հեռարձակվեց ANCA-ի սոցիալական ցանցերի էջերում և հասանելի է այստեղ՝

Կոնգրեսի հետ երկօրյա հանդիպումների ընթացքում ակտիվիստները պահանջեցին ապահովել «Ազատության աջակցության մասին» ակտի (FREEDOM Support Act) 907-րդ հոդվածի կիրարկումը, «Գլոբալ Մագնիտսկու» սանկցիաների կիրառումը ադրբեջանցի ռազմական հանցագործների նկատմամբ, «Հայաստանի անվտանգության գործընկերության մասին» ակտի (H.R.6840) և «Ադրբեջանի սանկցիաների վերանայման մասին» ակտի (H.R.5369) համահեղինակությունը, Արցախի բռնի տեղահանված բնակչության վերադարձի իրավունքը, ինչպես նաև հայ քրիստոնեական ժառանգության հուշարձանների պաշտպանությունը։