ՀՀ վարչապետ Նիկոլ Փաշինյանը երկօրյա այցով մեկնել է Ֆրանսիայի Հանրապետություն։ Տեղեկությունը հայտնել է նրա մամուլի խոսնակ Մելանյա Հարությունյանը։
«Վարչապետը Փարիզում կմասնակցի Միջազգային տիեզերական գագաթնաժողովին»,–սոցցանցում գրել է նա:
Նիկոլ Փաշինյանն էլ տեսանյութ է հրապարակել, որտեղ երևում է, որ Փարիզ է մեկնում սովորական չվերթով, էկոնոմ կլասով այլ ոչ թե կառավարական ինքնաթիռով։
Փաշինյանի հետ միասին, իր աշխատակազմից բացի, Փարիզ են մեկնում ՀՀ արտաքին գործերի նախարար Արարատ Միրզոյանը, տարածքային զարգացման և ենթակառուցվածքների նախարար Դավիթ Խուդաթյանը և բարձր տեխնոլոգիական արդյունաբերության և արհեստական բանականության նախարար Գևորգ Մանթաշյանը։
Sputnik Արմենիան հարցում է ուղարկել կառավարություն՝ պարզելու, թե ինչու Փաշինյանի այցելությունների համար կառավարական ինքնաթիռ չի օգտագործվել (վարչապետը մի քանի անգամ այցելել է FlyOne ինքնաթիռով)։
Կառավարությունից դեռևս չեն արձագանքել մեր հարցմանը։
Նիկոլ Փաշինյանը Փարիզ աշխատանքային այցի շրջանակում հանդիպելու է Ֆրանսիայի նախագահ Էմանուել Մակրոնի հետ:
Նշենք, որ Միջազգային տիեզերական գագաթնաժողովի նպատակն է քննարկել տիեզերական արդյունաբերության, կրող հրթիռների և արբանյակային խմբավորումների ուղեծիր դուրսբերման ոլորտում միջազգային համագործակցության հեռանկարները:
Փաշինյանը հրավիրվել և մասնակցում է գագաթնաժողովին՝ երկկողմ և բազմակողմ շփումների շրջանակում: