«Հանրապետություն» կուսակցության առաջնորդ Արամ Սարգսյանը գրում է.
«Ինչպե՞ս և ում հետ ԱԷԿ կառուցել։
ԱԷԿ կառուցելը ունի շատ լուրջ աշխարհաքաղաքական բաղադրիչ, և դա անտեսելը կարճամտություն է: Այն նաև ցուցիչ է, թե որ երկրների օրինակին ենք մենք հետևում։
Չինաստանը միակուսակցական երկիր է՝ կոմունիստական գաղափարախոսությամբ, որից մենք հրաժարվել ենք 1988–1989 թվականներին։
Ատոմակայանը ունի նաև էական ռազմական բաղադրիչ, և ամերիկյան ԱԷԿ ունենալը, որի մոդուլներից մեկը հնարավոր է տեղակայվի նաև Սյունիքում, միանշանակ կնվազեցնի պատերազմի վտանգը։
Չինաստանը Պակիստանի և Ադրբեջանի բարեկամն է, մեր բարեկամ Հնդկաստանի հակառակորդը, իսկ այն զենքը, որը գնում է Պակիստանը, որի մի մասն էլ վերավաճառվում է Ադրբեջանին, մատակարարվում է Չինաստանի կողմից։ Բացի այդ, հենց Չինաստանն էր, որ ՄԱԿ-ում վետո կիրառեց՝ Արցախի դեմ ագրեսիան դադարեցնելու նախաձեռնության դեմ, և այս փաստը անտեսել չի կարելի։
ԱԷԿ ունեցող երկիր լինելու համար պետք է վճարես նաև քո գրպանից։ Ձրի պանիրը թակարդում է։
ԱԷԿ ունեցող պետությունը պարտավոր է ինքնուրույն վճարել առնվազն 40%՝ դառնալով ԱԷԿ-ի բաժնեմասի տեր, ինչը կարևոր է նաև պատասխանատվության առումով։
«123» անվանումով փաստաթուղթը հենց այդ պատասխանատվության մասին է։
ՀՀ-ին անհրաժեշտ այդ 40%-ի գումարը մեզ կվարկավորի ՀԲ-ն՝ միանշանակ շատ ավելի ցածր տոկոսադրույքով, քան Չինաստանը կտրամադրի իր փոխարժեքով՝ յուանով։
Որտե՞ղ է չինական և ամերիկյան առաջարկների համեմատական ուսումնասիրությունը, ո՞վ է այն իրականացրել։ Ես վստահ եմ, որ չինական առաջարկը՝ թե՛ փոխարժեքի, թե՛ վճարման պայմանների, ինչպես նաև բազմաթիվ այլ՝ ոչ երկրորդական դրույթների մասով, իրականում ավելի թանկ է, քան ամերիկյան և ֆրանսիական առաջարկները։
ԱՄՆ մոդուլային ռեակտորները գոյություն ունեցողներից ամենալավն ու հուսալին են։ Դրանք արտադրվում են 1958 թվականից և երկարամյա ու լուրջ փորձություն են անցել ԱՄՆ ռազմածովային նավատորմի սուզանավերի, իսկ հետագայում նաև ավիակիրների վրա։
Չինաստանում արտադրվող ապրանքների շուրջ 99%-ը հիմնված է ամերիկյան տեխնոլոգիաների վրա, ներառյալ ավտոմեքենաները։ ԱՄՆ-ը տեխնոլոգիական առումով աշխարհի ամենազարգացած երկիրն է, և հակառակը պնդելը անգամ քննարկման արժանի չէ։
Բնականաբար, վերջերս ստորագրված համաձայնագրով ՀՀ-ի ռուսական էներգետիկ կախվածությունը կարող է կրճատվել մոտ 50 տոկոսով, և հենց դա է խիստ զայրացրել ՌԴ-ին։
Այնուհանդերձ, կարծում եմ՝ օգտակար կլիներ, որ ամբողջությամբ ռուսական շահ սպասարկող քաղաքական ուժերը, Ջեյ Դի Վենսի խոսքի համատեքստից հատվածներ կտրելով և թարգմանությանը հղում անելով սուր մեկնաբանություններ անելու փոխարեն, դիմեին իրենց ռուս կուրատորներին, փորձեին նրանց բերել մրցակցային դաշտ և ինչ-որ կերպ օգտակար լինեին մեր երկրի և նրա առաջընթացին։
Հ.Գ. ՀՀ-ն շարժվում է զարգացման և առաջընթացի ուղղությամբ, և՝ փառք Տիրոջը»։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: