Ջրային կոմիտեի նախագահ Արամազդ Ղալամքարյանն ու նախագահի տեղակալ Կարեն Դաղբաշյանը Տավուշի մարզում երկօրյա այցի շրջանակում ծանոթացել են մարզի ջրային տնտեսության առաջնահերթ խնդիրներին, առկա ենթակառուցվածքների վիճակին և դրանց բարելավման ուղղությամբ իրականացվող աշխատանքներին։
Այցի երկրորդ օրը մեկնարկել է «Տավուշ» ջրօգտագործողների ընկերության (ՋՕԸ) Նոյեմբերյանի տեղամասի գրասենյակում աշխատանքային խորհրդակցությամբ, որին ներկա են եղել «Տավուշ» ՋՕԸ-ի տնօրեն Ռոման Ահարոնյանը, տեղամասի պատասխանատու Հայրապետ Առուստամայանն ու Ընկերության մի շարք աշխատակիցներ։
Այնուհետև Նոյեմբերյանի շրջանում ՋԿ ղեկավար կազմն այցելել է «Զեյթուն-Հաղթանակ» և «Զեյթուն 1» պոմպակայաններ, ինչպես նաև հայ-վրացական սահմանային գծի հարակից հատվածով անցնող ջրանցք։ Տեղում ուսումնասիրվել են ջրանցքի վնասված հատվածները, քննարկվել դրանց վերականգնման և խնդրի հրատապ լուծման հնարավոր տարբերակները։
Շրջայցի ընթացքում ուսումնասիրվել է նաև Դեբեդավանի մայր ջրանցքը, մասնավորապես՝ կոլեկտորադրենաժային հատվածները, ինչպես նաև Բերդավանի նորակառույց պոմպակայանը։
Ջրային կոմիտեի ղեկավար կազմն այցելել է նաև «Gardenia Lebanese Farms» տնտեսություն, որտեղ ծանոթացել է սոճու ընկույզի, մայրու ընկույզի (փիճի), պեկան ընկույզի, շագանակի և իտալական ընկույզի մշակությանը։ Տեղում քննարկվել են նաև հողերի նպատակային խոշորացման գործընթացի համատեքստում գյուղատնտեսական նշանակության հողերի արդյունավետ օգտագործման, ոռոգման հնարավորությունների ընդլայնման և գյուղատնտեսական արտադրության զարգացման հեռանկարները։
Մարզային այցի ընթացքում ամփոփվել են Տավուշի մարզի ջրային տնտեսության առաջնահերթ խնդիրները, այդ թվում՝ ջրային ենթակառուցվածքների վերականգնման, ջրամբարների անվտանգության մակարդակի բարձրացման, ոռոգման համակարգերի արդյունավետության բարձրացման և գյուղատնտեսական հողերի արդյունավետ օգտագործման ուղղությունները, նախանշվել են դրանց լուծման հետագա քայլերը։
Ջրային կոմիտե
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: