Իսրայելը չի համաձայնել դադարեցնել ռազմական գործողությունները Գազայի հատվածում։ Այդ մասին հայտարարել է երկրի էներգետիկայի նախարար և ռազմաքաղաքական կաբինետի անդամ Էլի Կոենը։
Նրա խոսքով՝ վերջին 72 ժամվա ընթացքում անվտանգության կաբինետը չի քննարկել, այսպես կոչված, «Խաղաղության խորհրդի» առաջարկած ծրագիրը, որը նախատեսում է ՀԱՄԱՍ-ի զինաթափում, իսրայելական զորքերի դուրսբերում Գազայի հատվածից և կառավարման փոխանցում տեխնոկրատական վարչակազմին։
Կոենը շեշտել է, որ Իսրայելը շարունակելու է ոչնչացնել ահաբեկչական գործունեությանը ներգրավված բոլոր զինված անձանց։ Միաժամանակ նա նշել է, որ նախընտրելի կլիներ ՀԱՄԱՍ-ի զինաթափմանը հասնել դիվանագիտական ճանապարհով, սակայն կասկած է հայտնել, որ խմբավորումը կկատարի իր ստանձնած պարտավորությունները։
Ավելի վաղ Իսրայելի պաշտպանության բանակը հայտնել էր, որ օգոստոսի 1-ին Գազայի հատվածի հարավում ոչնչացվել է ՀԱՄԱՍ-ի «Նուխբա» ստորաբաժանման հրամանատար Սալեմ Ջամալ Աբդ ար-Ռահման Աբու Լաբադը։ Իսրայելական բանակի տվյալներով՝ նա մասնակցել է 2023 թվականի հոկտեմբերի 7-ին Նիր-Օզ կիբուցի վրա իրականացված հարձակմանը։