Պուտինն ու Տոկաևը Օմսկում կքննարկեն ռուս-ղազախական համագործակցության օրակարգը
Ռուսաստանի նախագահ Վլադիմիր Պուտինը և Ղազախստանի նախագահ Կասիմ-Ժոմարտ Տոկաևը հուլիսի 25-ին Օմսկում կմասնակցեն երկու երկրների XXII Միջտարածաշրջանային համագործակցության ֆորումի լիագումար նիստին։ Այս մասին հայտնել է Կրեմլի մամուլի ծառայությունը:
«Վլադիմիր Պուտինը և Կասիմ-Ժոմարտ Տոկաևը առանձին հանդիպման ընթացքում կքննարկեն Ռուսաստանի և Ղազախստանի համագործակցության օրակարգի արդիական հարցերը», — նշվում է Կրեմլի հաղորդագրության մեջ։
ՌԴ նախագահի մամուլի քարտուղար Դմիտրի Պեսկովն ավելի վաղ հայտնել էր, որ Պուտինը Օմսկ կմեկնի հուլիսի 24-ին Իրկուտսկ կատարած աշխատանքային այցից հետո։
Ֆորումն անցկացվում է Օմսկում հուլիսի 24-25-ը։ Այս տարվա թեման է «Համաշխարհային լոգիստիկ էկոհամակարգի ձևավորում. ռուս-ղազախական համագործակցության նոր հորիզոններ»։
Միջոցառման շրջանակում նախատեսված են պանելային քննարկումներ՝ նվիրված տրանսպորտային միջանցքների զարգացմանն ու արդյունաբերական համագործակցությանը, ինչպես նաև Ռուսաստանի և Ղազախստանի գործարար խորհրդի նիստը։
Ռուսաստանի և Ղազախստանի միջտարածաշրջանային համագործակցության ֆորումները անցկացվում են 2003 թվականից։ Օմսկը միջոցառումն ընդունում է արդեն երրորդ անգամ. նախկինում այն այստեղ անցկացվել է 2003 և 2019 թվականներին։
Մայիսին Օմսկի մարզպետ Վիտալի Խոցենկոն Պուտինին հրավիրել էր Տոկաևի հետ միասին մասնակցել ֆորումին, իսկ Ռուսաստանի նախագահը խոստացել էր այդ հարցը քննարկել ղազախ գործընկերոջ հետ։