Վարչական դատարանը մերժել է «Տաշիր Կապիտալի» հայցադիմումն ընդդեմ ՀՀ կառավարության
ԵՐԵՎԱՆ, 14 հուլիսի. /ԱՌԿԱ/. ՀՀ վարչական դատարանը մերժել է «ՏԱՇԻՐ ԿԱՊԻՏԱԼ» ՓԲԸ-ի կողմից ընդդեմ ՀՀ կառավարության ներկայացված հայցադիմումը։
Այս մասին հայտնում է ՀՀ տարածքային կառավարման և ենթակառուցվածքների նախարարությունը։
Սամվել Կարապետյանի «Տաշիր գրուպի» կազմում ընդգրկված ընկերությունը 2026 թվականի հուլիսի 1-ին հայցադիմում էր ներկայացվել ՀՀ վարչական դատարան՝ ընդդեմ ՀՀ կառավարության «Էներգետիկայի մասին» օրենքի հիման վրա՝ որպես բացառիկ միջոց «Հայաստանի Էլեկտրական Ցանցեր» ՓԲԸի 70% բաժնեմասի՝ Սահմանադրության 60-րդ հոդվածին համապատասխան օտարելու իրավահարաբերության բացակայությունը Ճանաչելու պահանջի մասին:
Նախարարության տվյալներով, դատարանը գտել է, որ նման հայցը ենթակա չէ քննության, և առկա է հայցադիմումի ընդունումը մերժելու՝ Վարչական դատավարության օրենսգրքի 80-րդ հոդվածի 1-ին մասի 1-ին կետով սահմանված հիմքը:
Մասնավորապես, ՀՀ վարչական դատավարության օրենսգրքի 80-րդ հոդվածի 1- ին մասի 1-ին կետի համաձայն՝ վարչական դատարանը մերժում է հայցադիմումի ընդունումը, եթե հայցը ենթակա չէ դատարանում քննության:
«ԱՌԿԱ» գործակալությունը մեկնաբանություն է խնդրել «Տաշիր Կապիտալի» մամուլի ծառայությունից։
2026 թվականի ապրիլի 9-ին ՀՀ վարչապետ Նիկոլ Փաշինյանը հայտարարել էր, որ «ՀԷՑ»-ը դե ֆակտո արդեն ազգայնացված է, իսկ հետագայում այդ կարգավիճակը կձևակերպվի իրավաբանորեն։
Հունիսի 22-ին իրավական տեղեկատվության պորտալում հրապարակվել է ՀՀ կառավարության որոշման նախագիծը՝ ՀԷՑ-ի բաժնետոմսերի 100%-ի նկատմամբ հանրության գերակա շահ ճանաչելու մասին։
Ավելի վաղ մի շարք լրատվամիջոցներ հայտնել էին պետության կողմից ՀԷՑ-ի ձեռքբերման գործարքի հնարավոր գնահատման մասին՝ շուրջ 380 հազար դոլարի չափով։ Այս գումարը զգալիորեն ցածր է այն ներդրումների ծավալից, որոնք «Տաշիր» ընկերությունների խումբը ներդրել է էներգետիկ ընկերությունում 2016 թվականից ի վեր (մոտ 900 մլն դոլար)։ Համաձայն առկա չհաստատված տեղեկությունների՝ գործարքը չի կայացել սեփականատիրոջ անհամաձայնության պատճառով։
ՀԷՑ-ին լիցենզիայից զրկելու մասին
2025 թվականի նոյեմբերի 17-ին Հայաստանի Հանրային ծառայությունները կարգավորող հանձնաժողովը (ՀԾԿՀ) գործարար Սամվել Կարապետյանին պատկանող «ՀԷՑ» ընկերությանը զրկել է էլեկտրական էներգիայի բաշխման լիցենզիայից։ Հանձնաժողովի համար հիմք են հանդիսացել 4-ամսյա վարչական վարույթի ընթացքում հայտնաբերված խախտումները, այդ թվում՝ էլեկտրական հաշվիչների ցուցանիշների, ներդրումային ծրագրերի, նոր բաժանորդների միացման, ինչպես նաև շինարարական և հակահրդեհային նորմերի հետ կապված խախտումները։
ՀԷՑ-ում չեն համաձայնել կարգավորողի եզրակացություններին և կասկածի տակ են դրել ստուգումների ու փորձաքննությունների արդյունքները։ ՀԷՑ-ի սեփականատեր ընկերությունը՝ «Տաշիր» խմբի մեջ մտնող «Տաշիր Կապիտալը», փորձել է դատարանում բողոքարկել ՀԾԿՀ-ի որոշումը, սակայն հայցը մերժվել է։