«Ռեգիոն» հետազոտական կենտրոնի տնօրեն Լաուրա Բաղդասարյանի ֆեյսբուքյան գրառումը
«Մենք բոլոր տեղամասերում ունենք վստահված անձինք, ունենք արձանագրությունները, մեր սեփական հաշվարկներն ենք անում։ Նաեւ, կարծում եմ, ԿԸՀ-ն տվյալները հրապարակում է, եւ ակնհայտ է», – այսպես հայտարարել է Նիկոլ Փաշինյանն իր կուսակցության հաղթանակի մասին։ Նախքան ԿԸՀ-ի՝ բոլոր ընտրատեղամասերի արձանագրված արդյունքների հրապարակումն ու ի մի բերելը։
Սա նշանակում է, որ
ա/ Փաշինյանի համար ԿԸՀ-ն արդեն ձեւական մի կառույց է, եղած-չեղած,
բ/ Վրաստանի վարչապետը, որն առաջինը շնորհավորեց Փաշինյանին հաղթանակի առիթով, հիմք է ընդունել ՔՊ-ական «սեփական հաշվարկները», կամ՝ Փաշինյանի սոցցանցային էջերից մեկը։
գ/ Փաշինյանն է այսուհետ լինելու ոչ միայն ՀՀ կառավարությունը, այլեւ ԿԸՀ-ն (կարդա վերը բերված մեջբերումը), ՆԳՆ-ն (հիշիր Արթուր Օսիպյանի ձերբակալության պատճառը), Դատախազությունը (հիշիր հրապարակված բազմաթիվ գաղտնալսումները), ԱԱԾ-ն (հիշիր, թե քանի քաղգործչի է անվանել օտարերկրյա գործակալ, նախքան այդ մասին այս կառույցի հրապարակային հայտարարությունները) ու ուրիշ ինստիտուտները։
Այս ընտրությունների դեռեւս անպատասխան հարցն ինձ համար մնաց այն, թե ո՞վ է այն ուղերձի հեղինակը, ում գլխում է ծագել այդ «դարակազմիկ» միտքը, որով առաջարկվում էր քաղաքացիներին քվեարկության չգնալ հագուստով, որոնց վրա մրցակից ուժերի ընտրական համարներ կան պատկերված։ Ով գիտի՞։ Իմ տեսած ՔՊ-ական բոլոր բարձրաստիճանները քվեարկության էին գնացել հայտնի քարտեզի կրծքանշանով։
Եթե ինձ հարցնեն , թե ինչ տարբերություն կա էն հանրահայտ «հայկական ռադիոյի» ու 2026-ի ընտրությունների միջեւ, ապա կասեմ, որ տարբերությունն այն է, որ «հայկական ռադիոյի» պատմությունները միշտ ծիծաղելի են, 2026-ի ընտրություններինը՝ միայն մասնակի։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: