Երևանում օդի աղտոտվածության ցուցանիշները 2026-ի փետրվարին նվազել են նախորդ տարվա նույն ժամանակահատվածի համեմատ՝ գտնվելով լավ կամ չափավոր միջակայքում։ Այս մասին հայտնեց Երևանի քաղաքապետարանի բնապահպանության վարչության պետի տեղակալ Գորիկ Ավետիսյանը մարտի 16-ի գործակարգավարական նիստի ժամանակ:
«Երևան քաղաքի շինհրապարակներում տեղադրված օդի մոնիտորինգի 188 սարքերից ստացված տվյալներով, 2026-ի փետրվար ամսվա միջինացված տվյալներով PM 2.5-ի արժեքը կազմել է 95, իսկ PM 10-ի համար կազմել է 47: Այս արժեքները գտնվում են լավ կամ չափավոր միջակայքերում։ Համեմատության համար նշեմ, որ 2025-ի փետրվար ամսին տեղադրված է եղել 167 սարքավորում, PM 2.5-ի համար արժեքները եղել են 109, իսկ PM 10-ի համար 51»,- ասաց Ավետիսյանը։
Ըստ Ավետիսյանի՝ ցուցանիշների նվազումը պայմանավորված է օդերևութաբանական պայմաններով, ինչը փաստում է, որ մարդածին աղտոտման աղբյուրները փոքր դեր ունեն ընդհանուր պատճառների մեջ։
Քաղաքապետ Տիգրան Ավինյանը պարզաբանեց, որ Երևանում և Արարատյան գոգավորությունում օդի որակը նոյեմբերից մարտ ամիսների ընթացքում մեծամասամբ պայմանավորված է մթնոլորտային առաստաղի բարձրությամբ:
«Այսինքն, սա ուղղակիորեն բնակլիմայական երևույթ է: Այդ շրջանում մեր մթնոլորտային շերտը իջնում է 1200 մետրից մինչև 80-100 մետր, և փաստացի բոլոր աղտոտումները, որոնք առկա են եղել այդ 1200 մետրի վրա, խտանում են 80 և 100 մետրի վրա և սա տեղի է ունենում ոչ միայն Երևանում, սա տեղի է ունենում ամբողջ Արարատյան դաշտավայրում, Վեդիում, Արտաշատում, Թուրքիայի տարածքներում և պայմանավորված են մեր աշխարհագրական դիրքով և բնակլիմայական պայմաններով»,- ասաց քաղաքապետը։
Ըստ Ավինյանի՝ ջերմաստիճանի բարձրացմանը զուգահեռ մթնոլորտային շերտը բարձրանում է մինչև 2000 մետր, ինչի հետևանքով աղտոտման մակարդակը նվազում է՝ չնայած շինարարության և երթևեկության ակտիվությանը։ Քաղաքապետը հավելեց, որ քաղաքապետարանը հրապարակում է բաց տվյալներ և կանխատեսումներ՝ բնակլիմայական պայմաններով պայմանավորված օդի պոտենցիալ վատթարացումների մասին բնակչությանը տեղեկացնելու համար։
Կարդացեք նաև՝ Օդի աղտոտվածության խնդիրը լուծելու համար քաղաքապետարանը կդիմի «էական սահմանափակումների»
The post Երևանում օդի աղտոտվածության ցուցանիշները նվազել են. քաղաքապետարան appeared first on CIVILNET.