ԵՐԵՎԱՆ, ՄԱՐՏԻ 12, 24News
Նիկոլ Փաշինյանն այսօրվա իր ճեպազրույցում հայտարարեց, որ պատարագների ժամանակ Արցախի Հանրապետության մասին հիշատակումները նշանակում են պատերազմի կոչ։
24News-ը դիմել է Մայր Աթոռի տեղեկատվական կենտրոն՝ դիրքորոշում ստանալու նպատակով, որտեղից, ի պատասխան մեր հարցման, նշել են․
«Սուրբ Պատարագի ընթացքում Արցախի և արցախահայության համար տասնամյակներով կատարված աղոթքը Եկեղեցու սուրբ խորաններից վերառաքվում է առ Աստված, քանզի ոտնահարված են արցախցիների արդար իրավունքները, յուրացվում, պղծվում և ոչնչացվում է Արցախի հոգևոր-մշակութային ժառանգությունը, և Բաքվի բանտերում ազատազրկված են մնում հայորդիները»։
Տեղեկատվական կենտրոնից տարօրինակ են համարել, որ վարչապետի կողմից աղոթքը դիտարկվում է իբրև պատերազմի կոչ․
«Այստեղ որևէ ռազմատենչ կոչ չկա, միայն արդարության աղոթք է, որը որպես հայց հնչում է առ Աստված»։
Նշենք նաև, որ Նիկոլ Փաշինյանը պատարագների ժամանակ Արցախի և արցախահայության համար աղոթք հնչեցնելը որակել է որպես այն, որ Ամենայն Հայոց Կաթողիկոսը ստանձնել է «պատերազմի կուսակցության» առաջնորդությունը։
Մերի Մանուկյան
–00—ՅՄ