Հայտնի գործարար Ռուբեն Վարդանյանի որդին՝ Դավիթ Վարդանյանը, հարցազրույց է տվել France 24-ին՝ անդրադառնալով իր հոր՝ Ադրբեջանում դատապարտված լինելու հանգամանքներին։ Նա ընդգծել է, որ իրենք որոշել են չբողոքարկել դատավճիռը՝ հաշվի առնելով ադրբեջանական դատարանի կողմնակալությունը և միջազգային իրավապաշտպան կազմակերպությունների մատնանշած՝ դատավարության խախտումները։ Դավիթը նշել է, որ իր հայրը, ով քաղաքացիական անձ է և երբեք չի ունեցել զինվորական պաշտոն, դատվել է ռազմական տրիբունալում, ինչը հակասում է միջազգային նորմերին։ Նա նաև ընդգծել է, որ դատավարությունը իրական դատաքննություն չէր, այլ քաղաքական շոու՝ նախատեսված ներքին և արտաքին լսարանի համար։
Դավիթ Վարդանյանը կարևորել է տարածաշրջանում իրական և երկարատև խաղաղության հաստատումը, որի միակ ճանապարհը բոլոր պատանդների ազատ արձակումն է։ Նա նշել է, որ ԱՄՆ փոխնախագահ Ջեյ Դի Վենսի այցը և նախագահ Թրամփի ջանքերը կարևոր են այս գործընթացում։ Վարդանյանը հույս է հայտնել, որ Հայաստանը և Ադրբեջանը կկարողանան գտնել համագոյակցելու ձև՝ հիմնված փոխադարձ հարգանքի վրա։ Նա նաև ընդգծել է, որ Հայաստանի կառավարությունն ունի գերագույն պատասխանատվություն ապահովելու բոլոր գերիների անվտանգ վերադարձը։