2020-ի նոյեմբերին Ռուսաստանի և նախագահ Վլադիմիր Պուտինի դերը վճռորոշ ու շատ կարևոր է եղել Հայաստանի և Ադրբեջանի միջև հրադադարի հաստատման հարցում։ Այս մասին հայտարարել է վարչապետ Նիկոլ Փաշինյանը փետրվարի 25-ին Լեհաստանում օտարերկրյա դեսպանների, դիվանագետների և վերլուծական կենտրոնների ներկայացուցիչների հետ հանդիպման ժամանակ։
Վարչապետն ընդգծել է, որ Հայաստանի և Ռուսաստանի հարաբերությունները այժմ վերափոխման փուլում են:.
«Մեր հարաբերությունները Ռուսաստանի հետ ներկայումս վերափոխման փուլում են։ Մենք նոր հարաբերություններ ենք ստեղծում և ձևավորում Ռուսաստանի հետ։ Միանշանակ է, որ այդ հարաբերությունները փոխվում են բազմաթիվ գործոնների պատճառով, բայց մենք վճռական ենք և կցանկանայինք զարգացնել մեր հարաբերությունները»,- ասել է վարչապետը։
Անդրադառնալով անվտանգային խնդիրներին՝ Փաշինյանը պարզաբանել է ՀԱՊԿ-ի հետ կապված դիրքորոշումը. «Մենք սառեցրել ենք մեր մասնակցությունը ՀԱՊԿ-ին… Հայաստանը հիասթափված էր, քանի որ ունենալով իրավական պարտավորություն՝ ՀԱՊԿ-ը հավուր պատշաճի չարձագանքեց անվտանգության մարտահրավերներին»։
Ռուսական ռազմական ներկայության մասով վարչապետը նշել է, որ Հայաստանը շնորհակալ է Ռուսաստանին 90-ականներից ի վեր սահմաններին ցուցաբերած աջակցության համար, սակայն այժմ բոլոր սահմանային անցակետերը վերահսկվում են Հայաստանի սահմանապահների կողմից։ Գյումրիի 102-րդ ռազմաբազայի վերաբերյալ նա հավելել է. «Մենք որևէ պլան, ծրագրեր չունենք և մտահոգություններ էլ չունենք կապված ռուսական ռազմաբազայի ներկայության հետ»։
The post 2020-ին ՌԴ-ի և Պուտինի դերը վճռորոշ է եղել հրադադարի հաստատման հարցում․ Փաշինյան appeared first on CIVILNET.