Առողջապահական համակարգում խորացող ճգնաժամի մասին ահազանգեցին Ազգային ժողովի դիմաց բողոքող բուժաշխատողները։ «Առողջության իրավունք» ՀԿ համահիմնադիր Անուշ Պողոսյանի փոխանցմամբ՝ պարտադիր բժշկական ապահովագրության ներդրումից հետո ոլորտում արձանագրվել են աշխատավարձերի էական կրճատումներ և վճարումների ուշացումներ։
Նրա խոսքով՝ ստացիոնար հաստատություններում կրճատումները կազմել են մոտ 30 տոկոս, իսկ որոշ պոլիկլինիկաներում՝ մինչև երկու-երեք անգամ։ Հատկապես ծանր վիճակում են հայտնվել բուժքույրերն ու սանիտարական աշխատողները։ Շատերը բախվել են վարկային պարտավորությունների կատարման խնդիրների։
Ոլորտի ներկայացուցիչները որպես պատճառ մատնանշում են նաև «Armed» էլեկտրոնային համակարգի աշխատանքի խափանումները և համատեղությամբ աշխատողների դեպքում կրկնակի ապահովագրական պահումները։
Բողոքի մասնակիցների գնահատմամբ՝ գործող իշխանությունը փորձում է «օպտիմալացնել» համակարգը՝ փաստացի կրճատելով աշխատողների եկամուտները։ Նրանց համոզմամբ՝ նույն մոտեցումը կարող է կիրառվել նաև կրթության և սոցիալական ապահովության ոլորտներում։