Ոչ մեկ չի կարող ինձ հետ նման հարցերում բացատրական աշխատանքներ տանել. Տեր Օշինը՝ Ռուբեն Ռուբինյանին

-Չեմ ցանկանում անդրադառնալ դրան, միայն կասեմ, որ նման հարցերում ոչ մեկ չի կարող ինձ հետ բացատրական աշխատանքներ տանել։ Հիմա շատ բան կարող է հայտարարել։ Հոգևոր կանոնին Տեր Օշինի ոչ մի ասած չի հակասում,- Aravot.am-ին շատ կարճ այսպես արձագանքեց Տեր Օշին քահանա Հայրապետյանն՝ անդրադառնալով ԱԺ փոխնախագահ Ռուբեն Ռուբինյանի այսօր իրեն կատարած այցին ու դրան հաջորդած Ռուբինյանի հայտարարությանը, թե ստիպված է եղել տեր Օշինին բացատրել, որ եկեղեցում մարդուն քաղաքական հայացքներով կամ կուսակցական պատկանելիությամբ պայմանավորված խտրականության ենթարկելը հակասում է և՛ հոգևոր եկեղեցական կանոնին, և՛ պարունակում է Քրեական օրենսգրքով սահմանված հոդվածի տարրեր:

Ռուբինյանն այսօր այցելել էր տեր Օշինին, պսակադրության ժամանակ «կարևորը քավորը թասիբով մարդ լինի, ՔՊ-ական չլինի» արտահայտության համար:

Հիշեցնենք, որ Ռուբինյանը տեսանյութ է հրապարակել համացանցում՝ պատմելով. «Վերադառնում եմ Սաղմոսավանքից, Տեր Օշինը, ցավոք, չհերքեց, որ քաղաքացուն ասել է՝ կարևորը քավորը թասիբով մարդ լինի, ՔՊ-ական չլինի: Ստիպված եղա Տեր Օշինին բացատրել և զգուշացնել, որ եկեղեցում մարդուն քաղաքական հայացքներով կամ կուսակցական պատկանելիությամբ պայմանավորված խտրականության ենթարկելը հակասում է և՛ հոգևոր եկեղեցական կանոնին, և՛ պարունակում է Քրեական օրենսգրքով սահմանված հոդվածի տարրեր։ Սա պիտի հիշեն մեր բոլոր եկեղեցականները, հատկապես նրանք, ովքեր եկեղեցին, որտեղ պիտի ծառայեն ժողովրդին, շփոթում են Քոչարյանի կամ օլիգարխների նախընտրական շտաբի հետ»։

Արփինե ՍԻՄՈՆՅԱՆ