ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանն ընդունել է Գերմանիայի ակադեմիական փոխանակման ծրագրի (DAAD) տարածաշրջանային գրասենյակի ղեկավար Սիլվիա Շմիդթին: Հանդիպմանը ներկա է եղել նաև Հայաստանում Գերմանիայի Դաշնային Հանրապետության փոխդեսպան Լարս Հեննիգը:
Ողջունելով հյուրերին՝ ԿԳՄՍ նախարարի տեղակալ Արթուր Մարտիրոսյանը ընդգծել է, որ հայկական կողմը հետաքրքրված է Գերմանիայի՝ որպես ԵՄ առաջատար երկրների մեկի, հետ գործընկերության խորացմամբ՝ հատկապես գիտական, հետազոտական և տեղեկատվական տեխնոլոգիաների ոլորտներում:
«Մենք պատրաստակամ ենք քննարկելու և իրագործելու Հայաստան-Գերմանիա կրթական և գիտական համագործակցության ինստիտուցիոնալ ամրապնդման, ակադեմիական համագործակցության նախագծեր իրականացնելու հնարավորությունները՝ ստեղծելով կայուն հարթակ երկկողմ հարաբերությունների խորացման և երկարաժամկետ ծրագրերի իրականացման համար»,- ասել է Արթուր Մարտիրոսյանը։
Նախարարի տեղակալը ներկայացրել է ՀՀ բարձրագույն կրթության ոլորտի առաջնահերթությունները՝ ընդգծելով բարձրագույն կրթության, գիտության միջազգայնացման առաջնահերթությունը, ինչպես նաև բուհերի վարկանիշային համակարգում ավելի բարձր արդյունքներ գրանցելու նպատակով համատեղ միջոցառումների անցկացման կարևորությունը:
DAAD-ի ղեկավար Սիլվիա Շմիդթը շնորհակալություն է հայտնել ընդունելության համար՝ կարևորելով համատեղ ջանքերով Հայաստանում գերմանագիտության զարգացումը՝ սկսած դպրոցներում գերմաներենի խորացված ուսուցումից մինչև մագիստրոսական, հետազոտական ծրագրերի իրականացում:
Հանդիպման շրջանակում կողմերն անդրադարձել են Ագրարային համալսարանում DAAD-ի ֆինանսավորմամբ իրականացվող ծրագրին, Արևելյան գործընկերության շրջանակում մի շարք բուհերի հետ համագործակցությամբ գերմանագիտության զարգացմանն ուղղված նախագծերին:
Առանձնակի շեշտվել են ԵՄ «Էրազմուս+» ծրագրի շրջանակում փոխգործակցության խորացման հնարավորությունները՝ տարբեր ուղղությունների մասնագետների ներգրավմամբ: Քննարկվել են կրթաթոշակային տեղերի տրամադրման հնարավորությունները, դասավանդողների մասնագիտական վերապատրաստման, դասընթացների անցկացման ձևաչափերը:
Արթուր Մարտիրոսյանը պաշտոնյային է ներկայացրել նաև «Ակադեմիական քաղաք» ծրագրի մանրամասները, դրա շրջանակում գերմանական կողմի հետ նախատեսվող համագործակցային շրջանակը:
Հանդիպմանը քննարկվել են նաև երկուստեք հետաքրքրություն ներկայացնող այլ հարցեր:
ՀՀ ԿԳՄՍՆ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԵՎ ՏԵՂԵԿԱՏՎՈՒԹՅԱՆ ՎԱՐՉՈՒԹՅՈւՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: