Նպատակ կա հիմնելու այնպիսի հաստատություն, որը հնարավորություն կտա անցկացնելու միջազգային մրցաշարեր, ասել է քաղաքապետի խորհրդականը
ԵՐԵՎԱՆ, 23 փետրվարի․/Նովոստի-Արմենիա/․ Երևանի քաղաքապետի հանձնարարականի համաձայն՝ Թենիսի միջազգային ակադեմիայի հիմնադրման հետ կապված պետք է կազմակերպվի և անցկացվի ներդրողի ներգրավման երկփուլ մրցույթ։
Այս մասին այսօր քաղաքապետարանի գործակարգավարական խորհրդակցության ժամանակ հայտնել է քաղաքապետի խորհրդական Սոնա Թևանյանը։
«Նպատակ կա հիմնելու այնպիսի հաստատություն, որը կհամապատասխանի միջազգային չափորոշիչներին և հնարավորություն կտա անցկացնելու միջազգային մրցաշարեր, ինչպես նաև պատրաստելու բարձր մակարդակի մարզիկներ` զարգացնելով այդ սպորտաձևը ՀՀ-ում », – նշեց Թևանյանը։
Նրա խոսքով՝ այս փուլում ներգրավվում է խորհրդատվական ծառայություն, որը կմշակի և կտրամադրի համապատասխան մրցութային փաթեթն ամբողջությամբ, որից հետո հնարավոր կլինի կազմակերպել և անցկացնել տվյալ մրցույթը։
«Այս պահին խորհրդատուի ծառայությունների ձեռքբերման գնման հայտը գնումների վարչությունում է կամ այսօր կլինի, և այս շաբաթվա ընթացքում կկարողանանք մրցույթը հայտարարել 30 օր տևողությամբ», – նշեց քաղաքապետի խորհրդականը։
Թևանյանը հայտնեց, որ խորհրդատուին կտրամադրվի 45 օր (6 աշխատանքային շաբաթ)՝ քաղաքապետարանի հետ համատեղ ամբողջական մրցութային փաթեթը մշակելու համար, որից անմիջապես հետո կհայտարարվի արդեն ներդրողի ներգրավման երկփուլ մրցույթը։