«Հանուն Սիմոնյանի ես պատրաստ էի ամեն ինչի». Իտալացի մասնագետի հուզիչ պատմությունը Նիկիտա Սիմոնյանի մասին

Առողջ ապրելակերպի մոլի նվիրյալ, իտալացի ճանաչված ֆուտբոլային մասնագետ Օրեստե Չինկվինին Ռուսաստանում աշխատելու տարիներից մի հուզիչ պատմություն է պատմել՝ կապված Նիկիտա Սիմոնյանի հետ։ Նա հիշել է, որ ամբողջ կարիերայի ընթացքում ինքն իր համար սահմանած «չոր օրենքը» խախտել է մեկ ու միակ անգամ։ Եվ դրա «մեղավորը» լեգենդար Նիկիտա Սիմոնյանն է եղել։

«Ինձ համար Նիկիտա Սիմոնյանը երկրորդ հայր էր դարձել։ Պատմական այդ լանչը սիցիլիական խոհանոցով մոսկովյան ռեստորաններից մեկում էր։ Ու չնայած ես անգամ գինի չեմ կարողանում տանել, Սիմոնյանի՝ այդ մեծ մարդու նկատմամբ ունեցած խորը հարգանքից ելնելով, մեկ բաժակ օղի համտեսեցի»,- պատմել է նա ռուսական լրատվամիջոցներից մեկին՝ հավելելով նաև, որ այդուհանդերձ օղու համն իրեն առանձնապես չի տպավորել։

Աշոտ ՀԱԿՈԲՅԱՆ