Իլոն Մասկը զղջացել է հանրապետականներին աջակցելու համար ծախսած հարյուր միլիոնավոր դոլարների համար

Միլիարդատեր Իլոն Մասկը խոստովանել է, որ իրեն «բավականին հիմար» է զգում ԱՄՆ Կոնգրեսի միջանկյալ ընտրություններում Հանրապետական ​​կուսակցության թեկնածուներին աջակցելու համար ծախսած հարյուր միլիոնավոր դոլարների պատճառով։


Չորեքշաբթի The New York Times թերթի DealBook գագաթնաժողովում տված հարցազրույցում նա նաև հայտարարել է, որ իրեն MAGA շարժման կողմնակից չի համարում և ունի չափավոր քաղաքական հայացքներ։


Աշխարհի ամենահարուստ մարդը՝ Մասկը, որը 2025 թվականին աշխատել է նախագահ Դոնալդ Թրամփի վարչակազմում, խոշոր գումարներ է փոխանցել Ներկայացուցիչների պալատի և Սենատի հանրապետական ​​թեկնածուներին աջակցող քաղաքական կոմիտեներին։ Ամենախոշոր ներդրումներից մեկը եղել է ավելի քան 150 միլիոն դոլարը, որն ուղղվել է Տեխասից Սենատի թեկնածու առաջադրված հանրապետական ​​Քեն Փեքսթոնի աջակցությանը։

Սակայն այդ ներդրումները զգալիորեն չեն արդարացել։ Դեմոկրատները համոզիչ հաղթանակ են տարել Կոնգրեսի երկու պալատների ընտրություններում, իսկ Փեքսթոնը պարտվել է դեմոկրատ Ջեյմս Թալարիքոյին։ Վերջինս Մասկի՝ իր մրցակցին ցուցաբերած աջակցությունը դարձրել էր նախընտրական քարոզարշավի փաստարկներից մեկը։ Դեմոկրատները ստացել են նաև Տեխասի նահանգապետի պաշտոնը. մի նահանգ, որում տեղակայված է Մասկի SpaceX և Tesla ընկերությունների արտադրական և գործառնական հզորությունների զգալի մասը։

Հաղորդավար Էնդրյու Ռոս Սորկինի հետ զրույցում միլիարդատերը բացատրել է, որ ցանկանում էր օգնել հանրապետականներին պահպանելու մեծամասնությունը Սենատում, որպեսզի 2029 թվականին կուսակցություններից ոչ մեկը միաժամանակ վերահսկողություն չստանա նախագահական պաշտոնի և Կոնգրեսի երկու պալատի նկատմամբ։ Նրա ասելով՝ այդ նպատակին չի հաջողվել հասնել։

«Ակնհայտ է, որ հանրապետականները ջախջախիչ պարտություն կրեցին այս ընտրություններում, և ես ինձ բավականին հիմար եմ զգում, որ այդքան գումար ծախսեցի և փոխարենը գրեթե ոչինչ չստացա։ Թեև, հնարավոր է, առանց այդ ներդրումների ամեն ինչ էլ ավելի վատ լիներ»,- ասել է Մասկը։ Նա հավելել է, որ եթե կարողանար վերադառնալ անցյալ, «հավանաբար ավելի քիչ կծախսեր»։

Ավելի ուշ Մասկը հայտարարել է, որ ձգտել է պահպանել «զսպումների և հակակշիռների» համակարգը, և իր հայացքներն անվանել է «գաղափարախոսական տեսանկյունից միանգամայն չափավոր»։ Նա ընդգծել է, որ ծայրահեղ քաղաքական համոզմունքներ չունի։

Սորկինը հիշեցրել է ներգաղթի հարցերով միլիարդատիրոջ հակասական հայտարարությունների և MAGA շարժմանը՝ Թրամփի «Դարձնենք Ամերիկան կրկին մեծ» քաղաքական կարգախոսին նախկինում ցուցաբերած աջակցության մասին։ Մասկը պատասխանել է, որ իրեն այդ շարժման կողմնակից չի համարում։

«Ես MAGA չեմ։ Վստահ չեմ, թե կոնկրետ ինչ է նշանակում MAGA, բայց եթե խոսքը Հանրապետական ​​կուսակցության քաղաքական դրույթների համալիրին կուրորեն հավատարիմ լինելու մասին է, ապա ես հաստատ դրան չեմ պատկանում։ Կարծում եմ, որ երկու կուսակցությունն էլ ունեն ինչպես դրական, այնպես էլ բացասական կողմեր»,- հայտարարել է նա։

Սա նկատելի փոփոխություն է միլիարդատիրոջ հռետորաբանության մեջ, որը նախկինում հայտնվում էր MAGA գլխարկներով, իսկ 2024 թվականին Թրամփի հանրահավաքի ժամանակ կատակել էր. «Ես պարզապես MAGA չեմ, ես Dark MAGA եմ»։ Նույն թվականին Մասկը հարյուր միլիոնավոր դոլարներ է ծախսել Թրամփի նախագահական արշավին և հանրապետական ​​այլ թեկնածուներին աջակցելու համար։ Ավելի ուշ նա գլխավորել է Թրամփի վարչակազմին առընթեր ստեղծված Կառավարության արդյունավետության դեպարտամենտը, որը զբաղվում էր պետական ​​ծախսերի կրճատմամբ։ Անցյալ տարի նախագահի հետ ունեցած կարճատև կոնֆլիկտից հետո Մասկը, ըստ ամենայնի, պահպանել է նրա հետ մտերիմ հարաբերությունները։ Այս շաբաթ միլիարդատերը նաև ուղեկցել է Թրամփին Չինաստան կատարած ուղևորության ժամանակ։

Նախագահի հետ Մասկի դաշինքը հարուցում է դեմոկրատների քննադատությունը, որոնք մտադիր են լայնածավալ հետաքննություններ անցկացնել Թրամփի վարչակազմի գործունեության վերաբերյալ՝ հաջորդ տարի Կոնգրեսի երկու պալատի նկատմամբ վերահսկողություն ստանալուց հետո։ Ակնկալվում է, որ Մասկը կդառնա խորհրդարանական ստուգումների թիրախներից մեկը։

Միևնույն ժամանակ, միլիարդատերը հայտարարել է, որ չի վախենում իր բիզնեսի համար խնդիրներից՝ դեմոկրատ Ջինա Ինոխոսայի՝ Տեխասի նահանգապետ ընտրվելուց հետո։ Մասկը շեշտել է, թե, դատելով նրա մասին լսածներից՝ «Տեխասում ամեն ինչ լավ կլինի»։ Նա ապագա նահանգապետին անվանել է բավականին չափավոր քաղաքական գործիչ և ընդգծել, որ նրան չի համարում ծայրահեղ ձախ թևի ներկայացուցիչ։

Մասկը չափազանցված է անվանել իր՝ օրենքի հնարավոր խախտումների մասին որոշ դեմոկրատների հայտարարությունները։ «Այս երկրում, ինչպես հույս ունեմ, մարդուն բանտ ուղարկելու համար նա այնուամենայնիվ պետք է իրական հանցագործություն կատարի։ Իդեալական տարբերակում ամեն ինչ հենց այդպես պետք է աշխատի»,- հայտարարել է նա։

Սակայն Արիզոնայից դեմոկրատ սենատոր Ռուբեն Գալյեգոն հասկացրել է, որ միլիարդատիրոջ հռետորաբանության փոփոխությունը չի ազդի դեմոկրատների ծրագրերի վրա։ «Դատարանի ծանուցագիր դու, միևնույն է, կստանաս»,- գրել է նա X սոցիալական ցանցում։

Leave a comment