Ադրբեջանում համակարգչային աջակցությամբ Eternity-2026 խորագրով հրամանատարաշտաբային զորավարժություն է անցկացվում՝ Թուրքիայի և Վրաստանի հետ համատեղ:
Ադրբեջանի պաշտպանության նախարարությունը հաղորդում է, որ զորավարժությունների սցենարին համապատասխան՝ երեք երկրների ներկայացուցիչներից կազմված միացյալ շտաբում պլանավորվում են ռազմավարական տնտեսական օբյեկտների և տարածաշրջանով անցնող էներգետիկ ու հաղորդակցությունների գծերի պահպանության գործողություններ:
Ժամանակակից համակարգչային մոդելավորման օգնությամբ վերլուծվում են հնարավոր սպառնալիքները, ճգնաժամային իրավիճակներում որոշումներ են ընդունվում, ինչպես նաև կազմակերպվում է փոխգործողությունը տարբեր զորատեսակների և համապատասխան պետական կառույցների միջև:
Մասնակիցները զորավարժարանում մշակում են գործողության անցկացման շրջանի մեկուսացման, անօդաչու թռչող սարքերի օգնությամբ դիտարկման, ինչպես նաև պայթուցիկ սարքերի և չճանաչված անօդաչուների վնասազերծման գործողություններ, APA լրատվական գործակալության փոխանցմամբ՝ ասված է հաղորդագրությունում:
Բացի այդ, հաջողությամբ կատարվում են ռազմակայանի վրա հարձակումը հետ մղելու, դիվերսիաներից երկաթուղային գծերի և նավթագազային ենթակառուցվածքի պաշտպանության, հրդեհաշիջման և վիրավորների տարհանման խնդիրներ, հաղորդում է Ադրբեջանի ռազմական գերատեսչությունը:
«Ազատություն» ռ/կ հայկական ծառայություն
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: