Հայաստանի կառավարությունը նոյեմբերի 19-ի նիստում հաստատել է 2026–2031 թվականների գործողությունների ծրագիրը, որը ներառում է ներքին և արտաքին քաղաքականության հիմնական նպատակներն ու դրանց իրականացման 733 միջոցառում վեց հիմնական ուղղություններով։ Փաստաթուղթը հիմնված է «իրական Հայաստանի» գաղափարախոսության և կառավարության 2026–2031 թվականների ծրագրի վրա։
Ինչու է դա կարևոր. Ծրագիրը սահմանում է հնգամյա ռազմավարական ուղենիշները՝ խաղաղության օրակարգից ու ԵՄ մերձեցումից մինչև տնտեսության դիվերսիֆիկացում, էներգետիկ ինքնաբավության ամրապնդում և պետական ծառայությունների լիարժեք թվայնացում։
2026–2031 թթ. գործողությունների ծրագրի առանցքային մանրամասները.
-
Արտաքին քաղաքականություն և խաղաղության օրակարգ.
-
Հայաստանի և Ադրբեջանի միջև խաղաղության գործընթացի ամրապնդում ու ինստիտուցիոնալացում և «Խաղաղության խաչմերուկ» նախագծի իրականացում։
-
Թուրքիայի հետ սահմանների լիարժեք բացում և հարաբերությունների կարգավորում։
-
ԵՄ-ի հետ վիզաների ազատականացում (վարչապետ Նիկոլ Փաշինյանը 2029 թվականն իրատեսական է համարել՝ շեշտելով կենսաչափական անձնագրերի ներդրման ու սահմանների կառավարման բարեփոխումների կարևորությունը) և ԵՄ անդամակցության հեռանկարով հարաբերությունների խորացում։
-
-
Տնտեսական նպատակներ և ենթակառուցվածքներ.
-
Տարեկան միջինը 6% տնտեսական աճ, 125 հազար նոր աշխատատեղերի ստեղծում, տեղական ծագման ապրանքների արտահանման ծավալների առնվազն կրկնապատկում, արդյունաբերական արտադրության 50% աճ, գյուղատնտեսության ՀՆԱ-ի արժեքի առնվազն 50% ավելացում և հացահատիկի արտադրության կրկնապատկում։
-
10 ջրամբարի կառուցման աշխատանքների մեկնարկ՝ մինչև 2033 թվականն ավարտելու նպատակով, 350 կմ ջրանցքի ու խողովակաշարի կառուցում և վերակառուցում, ինչպես նաև Երևանում, Գյումրիում և Վանաձորում շուրջօրյա ջրամատակարարման ապահովում։
-
-
Սոցիալական, էներգետիկ և ինստիտուցիոնալ բարեփոխումներ.
-
Աղքատության մակարդակի նվազեցում 5 տոկոսային կետով և ողջ բնակչության ներառում առողջության համապարփակ ապահովագրության համակարգում։
-
Ինտեգրում տարածաշրջանային էներգահամակարգերին, 1000 ՄՎտ հզորությամբ արևային (ֆոտովոլտային) և 8000 ՄՎտ հզորությամբ կուտակիչ էլեկտրակայանների գործարկում։
-
Դատական համակարգի ու պետական կառավարման բարեփոխումներ՝ մարդու իրավունքների երաշխավորված պաշտպանությամբ, ապօրինի ակտիվների վերադարձի գործընթացի կատարելագործմամբ և պետական ու համայնքային հիմնական ծառայությունների թվայնացմամբ։
-