Կրկին կեղծ հաղորդագրություններ են տարածվում. ՆԳՆ–ն զգուշացնում է

Բաժանորդագրվել

ՆԳՆ–ն հորդորում է չբացել կասկածելի հղումները, չտրամադրել անձնական և բանկային տվյալներ։

ԵՐԵՎԱՆ, 16 նոյեմբերի – Sputnik. Քաղաքացիները iMessage համակարգի միջոցով ստանում են ՀՀ ՆԳՆ և Ճանապարհային ոստիկանության անունից ուղարկվող կեղծ հաղորդագրություններ։ Այս մասին հայտնում է ՆԳՆ մամուլի ծառայությունը։

«Դրանք հիմնականում ուղարկվում են օտարերկրյա հեռախոսահամարներից և պարունակում են պաշտոնական կայքերին նմանակող հղումներ, որոնց միջոցով զեղծարարները փորձում են ձեռք բերել անձնական և բանկային տվյալներ՝ գումար հափշտակելու նպատակով»,–նշված է հաղորդագրության մեջ։

ՆԳՆ–ն հորդորում է չբացել կասկածելի հղումները, չտրամադրել անձնական և բանկային տվյալներ։

Խորհուրդ է տրվում արգելափակել ուղարկողին և հաղորդագրությունը նշել որպես անցանկալի (Spam/Junk)։

Տվյալների փոխանցման կամ կասկածելի գործողությունների դեպքում անմիջապես պետք է կապ հաստատել բանկի հետ և կատարվածի մասին տեղեկացնել ոստիկանությանը։

Ընդգծվում է, որ պետական մարմնի անվանման օգտագործումը չի նշանակում, որ հաղորդագրությունն իրական է։ Տեղեկատվությունը անհրաժեշտ է ստուգել միայն պաշտոնական աղբյուրներով։

Հիշեցնենք` զեղծարարությունների զոհ դարձած քաղաքացիները պարբերաբար բողոքի ակցիաներ են իրականացնում ՀՀ կառավարության, նաև տարբեր բանկերի գլխամասային գրասենյակների մոտ։ Նրանց անուններով տարբեր չափերի կեղծ վարկեր են ձևակերպվել, անձնական հաշիվներից գումարի հափշտակություն է արվել և այլն։
ԿԲ նախագահ Մարտին Գալստյանը հայտարարել է, որ մինչև քրեական գործերի դատաքննության ավարտը և որոշման հրապարակումը սառեցվելու են բոլոր վարկային պարտավորությունները և տույժերը։

Leave a comment