ՀՀ ԿԳՄՍ նախարար Ժաննա Անդրեասյանն ու ՌԴ սպորտի նախարար Միխայիլ Դեգտյարևն այսօր ստորագրել են ֆիզիկական կուլտուրայի և սպորտի ոլորտում համագործակցության զարգացման 2027 թվականի միջոցառումների ծրագիրը։ Այս մասին հայտնում է ՀՀ ԿԳՄՍ մամուլի ծառայությունը։
Նշվում է, որ Ժաննա Անդրեասյանը Միխայիլ Դեգտյարևի հետ հանդիպել է Ռուսաստանի Դաշնություն կատարած աշխատանքային այցի շրջանակում։
Հանդիպման ընթացքում քննարկվել են ֆիզիկական կուլտուրայի և սպորտի ոլորտներում երկկողմ համագործակցության ընդլայնմանը, մասնագիտական կապերի ամրապնդմանը և համատեղ նախաձեռնությունների իրականացմանը վերաբերող հարցեր, կարևորվել է երիտասարդ մարզիկների աջակցությանը և սպորտի զարգացմանն ուղղված համատեղ ծրագրերի իրականացումը։
«Կողմերն անդրադարձել են մարզիչների և մարզական մասնագետների մասնագիտական կարողությունների զարգացման հնարավորություններին։ Այս համատեքստում քննարկվել են փոխադարձ վերապատրաստումների, մասնագիտական փորձի փոխանակման ծրագրերի, համատեղ գիտագործնական համաժողովների և սեմինարների կազմակերպման, ինչպես նաև մարզիկների պատրաստման և վերականգնման ժամանակակից մեթոդաբանությունների փոխանակման հարցերը։ Կարևորվել է նաև սպորտային բժշկության ոլորտում համագործակցության զարգացումը»,–ասվում է հաղորդագրության մեջ։
Անդրադարձ է եղել նաև մասսայական սպորտի զարգացմանը, զանգվածային մարզական միջոցառումների կազմակերպման և մարզական ենթակառուցվածքների զարգացման ուղղությամբ փորձի փոխանակման հնարավորություններին։
Առանձին քննարկման առարկա են դարձել ադապտիվ սպորտին առնչվող հարցերը՝ կարևորելով հաշմանդամություն ունեցող մարզիկների պատրաստման մեթոդաբանությունը և մասնագիտական փորձի փոխանակումը։
Հիշեցնենք` նոյեմբերի 9-ից 16-ը Ռուսաստանի Դաշնությունում՝ Մոսկվայում և Սանկտ Պետերբուրգում, անցկացվում են Հայաստանի մշակույթի օրեր՝ նվիրված Հայաստանի անկախության 35-ամյակին։ Միջոցառումն իրականացվում է ՀՀ ԿԳՄՍ նախարարության և ՌԴ մշակույթի նախարարության համատեղ նախաձեռնությամբ։
ԿԳՄՍ նախարար Ժաննա Անդրեասյանի գլխավորած պատվիրակությունը պաշտոնական այցով Ռուսաստանում է «Հայաստանի մշակույթի օրեր» միջոցառման շրջանակում։
Նոյեմբերի 13–ին Հայաստանը և Ռուսաստանը ստորագրեցին 2027–2029 թվականների համագործակցության ծրագիրը մշակույթի ոլորտում։