ԲԴԽ-ն կասեցրեց դատավորներ Մասիս Մելքոնյանի և Գևորգ Պողոսյանի լիազորությունները

ՀՀ բարձրագույն դատական խորհուրդն այսօր կասեցրեց դատավորներ Մասիս Մելքոնյանի և Գևորգ Պողոսյանի լիազորությունները: Այս մասին նշված է ԲԴԽ որոշումների մեջ։

«Բարձրագույն դատական խորհուրդը որոշում է կասեցնել դատավորներ Գևորգ Պողոսյանի և Մասիս Մելքոնյանի լիազորությունները՝ մինչև քրեական վարույթի ավարտը»,- ասված է ԲԴԽ որոշման մեջ։

Նշվում է, որ որոշումը կայացվել է դռնփակ նիստում` բավարարելով գլխավոր դատախազի պարտականությունները կատարողի դիմումը Երևան քաղաքի առաջին ատյանի ընդհանուր իրավասության քրեական դատարանի դատավորներ Գևորգ Պողոսյանի և Մասիս Մելքոնյանի նկատմամբ հանրային քրեական հետապնդում հարուցելուն համաձայնություն տալու վերաբերյալ։ Դիմումը ԲԴԽ–ն ստացել է նոյեմբերի 13–ին։

Հիշեցնենք` այսօր ավելի վաղ հայտնի էր դարձել, որ դատախազությունը միջնորդություն է ներկայացրել 2 դատավորի անձեռնմխելիությունից զրկելու վերաբերյալ։

Գործընթացի հիմքում պաշտոնեական լիազորությունների չարաշահման վերաբերյալ տեղեկություններն են։

Խոսքը, մասնավորապես, վերաբերում է որոշ անձանց նկատմամբ դատական որոշումների կայացմանը, որոնց արդյունքում վերջիններս հնարավորություն են ստացել անարգել լքելու Հայաստանի Հանրապետությունը։

Sputnik Արմենիա

Leave a comment