Իտալիան մերժել է Միացյալ Թագավորության՝ Գերմանիային «Ապագա մարտական օդային համակարգ» նախագծում ներառելու առաջարկը. հայտնել է «Financial Times»-ը՝ վկայակոչելով տարբեր աղբյուրներ։
Ծրագիրը նոր սերնդի կործանիչ ինքնաթիռների մշակման նախաձեռնություն է։
Մարտական ավիացիոն ծրագրի ապագան քննարկելու նպատակով բրիտանացի և ճապոնացի գործընկերների հետ անցկացված առցանց հանդիպման ժամանակ Իտալիայի պաշտպանության նախարար Գվիդո Կրոզետտոն, ըստ տեղեկությունների, կտրուկ դեմ է արտահայտվել Գերմանիայի լիարժեք մասնակցությանը՝ պնդելով, որ Բեռլինին պետք է տրվի միայն դիտորդի կարգավիճակ։
Աղբյուրները նշել են, որ Ճապոնիայի կառավարությունը նույնպես վերապահումներ է հայտնել նման բարդ նախագծում հանկարծակի նոր գործընկեր ներգրավելու հեռանկարի վերաբերյալ՝ մտահոգություն հայտնելով, որ Գերմանիայի մասնակցությունը կարող է հանգեցնել ծրագրի ժամկետների ձգձգման։
Ինչպես նշել է FT-ն, քիչ հավանական է, որ Գերմանիան կհամաձայնի դիտորդի կարգավիճակին։ Գերմանացի մի պաշտոնյա թերթին հայտնել է, որ Բեռլինը Հռոմի առաջարկը համարում է «անընդունելի» և շարունակելու է պնդել նախագծին լիարժեք մասնակցելու հարցը։
Նոր մարտական ինքնաթիռի մշակման գործընթացում Բեռլինին ներգրավելու առաջարկը հնչել է հոկտեմբերին՝ Միացյալ Թագավորության վարչապետ Էնդի Բյուրնհեմի և Գերմանիայի կանցլեր Ֆրիդրիխ Մերցի միջև քննարկումների ժամանակ։ Այլ տարբերակներ դիտարկելու անհրաժեշտությունն առաջացել է այն բանից հետո, երբ այս ամռանը կողմերի միջև տարիներ շարունակվող տարաձայնությունների պատճառով տապալվել էր ֆրանս-գերմանական մեկ այլ նախագիծ՝ ուղղված եվրոպական նոր սերնդի կործանիչ ինքնաթիռի ստեղծմանը։
Միացյալ Թագավորությունը, Իտալիան և Ճապոնիան 2022 թվականի դեկտեմբերին համաձայնության էին եկել վեցերորդ սերնդի մարտական ինքնաթիռ մշակելու շուրջ, որը պետք է ծառայի որպես այլընտրանք ԱՄՆ-ում մշակվող կործանիչներին։ Օդանավի մշակման մեջ առաջատար դեր են խաղում բրիտանական BAE Systems ընկերությունը, իտալական Leonardo ֆիրման և ճապոնական Mitsubishi Heavy Industries կորպորացիան։