Կիպրոսի ֆուտբոլի ֆեդերացիան նախագահ Հարիս Լոիզիդիսի գլխավորությամբ եղել է Հայոց ցեղասպանության զոհերի հուշահամալիրում և հարգանքի տուրք մատուցել անմեղ զոհերի հիշատակին:
Ֆեդերացիայի մամուլի ծառայությունից հայտնում են, որ պատվիրակությունն այցելել է նաև Հայոց ցեղասպանության թանգարան-ինստիտուտ:
«Հայոց ցեղասպանությունը 20-րդ դարի՝ մարդկության դեմ ուղղված ամենաողբերգական հանցագործություններից մեկն է։ Այն սկսվել է 1915 թվականին օսմանյան իշխանությունների կողմից, ինչի հետևանքով զոհվեց ավելի քան մեկ միլիոն հայ»,- ասվում է Կիպրոսի ֆուտբոլի ֆեդերացիայի հաղորդագրության մեջ:
Կիպրոսի հավաքականը Երևան էր ժամանել Հայաստանի հավաքականի դեմ Ազգերի լիգայի խմբային փուլի նախավերջին տուրի հանդիպման համար: Վազգեն Սարգսյանի անվան «Հանրապետական» ստադիոնում նոյեմբերի 12-ին կայացած խաղում գրանցվել էր 1:1 հաշիվը: