Քաղաքականություն
10.11.2026 | 18:00
Ամերիկացի բանակցողները վերջին շրջանում առաջարկել են Ռուսաստանի և Ուկրաինայի միջև տարածքային համաձայնագրի շրջանակում փոփոխել Դոնեցկի և Լուգանսկի մարզերի սահմանները։ Այս մասին, հղում անելով իր աղբյուրներին, գրում է The Economist-ը, փոխանցում է Meduza-ն։
Պարբերականի զրուցակիցների խոսքով՝ այդ առաջարկի նպատակն այն է, որ Ռուսաստանը կարողանա հայտարարել շրջանների ամբողջական գրավման մասին, մինչդեռ Ուկրաինան ստիպված չլինի զիջել որևէ տարածք։
The Economist-ի աղբյուրները նաև պատմել են բանակցությունների ընթացքում Ռուսաստանի դրսևորած «անսովոր ճկունության» մասին։ Սակայն, նրանց նշմամբ, այդ ճկունությունն ի հայտ է եկել այն բանից հետո, երբ առաջարկվել է քննարկել Եվրոպայի անվտանգությունը։ Այժմ ԱՄՆ-ն մտավախություն ունի, որ Մոսկվան նման քննարկումների պատրվակով կարող է ձգձգել ռազմական գործողությունները։
ԱՄՆ նախագահ Դոնալդ Թրամփը նոյեմբերի 9-ին հայտարարել էր, որ պատերազմի ավարտից հետո Ուկրաինան «մի փոքր այլ տեսք կընդունի»։
Ռուսաստանը պնդում է, որ միջազգային մակարդակով ճանաչվի իր վերահսկողությունը օկուպացված Ղրիմի, ինչպես նաև Դոնեցկի, Լուգանսկի, Զապորոժիեի և Խերսոնի մարզերի նկատմամբ՝ ներառյալ այն տարածքները, որոնք ներկայումս չի վերահսկում։
Ուկրաինայի համար նման պահանջն անընդունելի է։ Այս մասին հոկտեմբերի վերջին Meduza-ին հայտնել է Ուկրաինայի նախագահ Վլադիմիր Զելենսկիին գրասենյակին մոտ կանգնած աղբյուրը։
«Մենք ունենք ընդհանուր համաձայնություն․ Ուկրաինան չի հանձնում իր տարածքները», – ընդգծել էր նա։
Թարգմանությունը՝ Էմմա Չոբանյանի