TRIPP-ի հետ կապված՝ բյուջետավորված գումար չունենք, որովհետև պլանն այնպիսին է, որ ենթակառուցվածքների զարգացման ֆինանսավորումը պետք է իրականացվի արդեն ստեղծված ընկերության միջոցներով։ Այդ մասին Ազգային ժողովում 2027 թվականի պետական բյուջեի նախնական քննարկման ժամանակ ասաց ֆինանսների նախարար Վահե Հովհաննիսյանը՝ անդրադառնալով «Հայաստան» խմբակցության պատգամավոր Արթուր Խաչատրյանի հարցին, թե արդյոք որոշակի գումար նախատեսվում է 2027-ին TRIPP-ի ենթակառուցվածքների կառուցման ուղղությամբ։
Այս համատեքստում նախարարն ընդգծեց, որ հայկական կողմն ունի մի հանձնառություն, որ TRIPP-ի ենթակառուցվածքների համար հատկացված հողերը պետք է հանձնվեն մաքրված վիճակում։
«Քանի որ նախագիծ դեռ չկա, և հայտնի չէ, թե կոնկրետ ինչ տեսք է ունենալու ճանապարհը, և թե կոնկրետ որ հողակտորներն են, որ պետք է գերակա շահ ճանաչվեն, մենք դրա համար էլ բյուջե չունենք նախատեսած։
Երբ այդ աշխատանքն արվի, այն ժամանակ մենք մեր միջոցներից կտրամադրենք այդ աշխատանքն անելու համար [գումար]»,- ասաց նախարարը՝ նշելով, որ խոսքն այս պարագայում մեծ գումարի մասին չէ։
Այս համատեքստում ՏԿԵ նախարար Դավիթ Խուդաթյանը, անդրադառնալով թեմային, հայտարարեց, որ առաջիկայում հայկական կողմը կմեկնարկի որոշ ենթակառուցվածքների նախագծման աշխատանքներ: