ԱՄՆ-ի Հանրապետական կուսակցության մերձեցումը ամերիկյան տեխնոլոգիական կորպորացիաների հետ և արհեստական բանականության գրեթե անսահմանափակ զարգացմանն աջակցելը կարող էին լուրջ հետևանքներ ունենալ կուսակցության համար ԱՄՆ Կոնգրեսի միջանկյալ ընտրություններում։ Այս մասին գրում է Financial Times-ը (FT)։
Թերթի տվյալներով՝ տեխնոլոգիական բիզնեսի ներկայացուցիչներն ակտիվորեն աջակցել են նախագահ Դոնալդ Թրամփին և նրա դաշնակիցներին՝ ակնկալելով, որ հանրապետականները խիստ սահմանափակումներ չեն սահմանի ոլորտի համար։ Վերջին մեկ տարվա ընթացքում այդ կուսակցության օրենսդիրները խոչընդոտել են առանձին նահանգների՝ արհեստական բանականության անվտանգության ոլորտում կարգավորումներ ընդունելու փորձերը և քննադատել տվյալների կենտրոնների կառուցմանը դեմ արտահայտվողներին։ Թրամփը նույնպես դատապարտել է նման նախագծերի հակառակորդներին՝ նրանց անվանելով «հետամնաց և աղքատ»։ Հանրապետականների նախընտրական շտաբերին աջակցելու նպատակով տեխնոլոգիական ոլորտի դոնորները փոխանցել են ավելի քան 600 մլն դոլար։ FT-ի գնահատմամբ՝ ընտրողները չեն աջակցել այս դաշինքին։
Թերթը դեմոկրատների հաջողությունը, մասնավորապես, կապում է այն հանգամանքի հետ, որ նրանք արձագանքել են արհեստական բանականության զարգացման վերաբերյալ հասարակության մտահոգություններին։ Կուսակցության որոշ ներկայացուցիչներ իրենց նախընտրական արշավները կառուցել են ոլորտի նկատմամբ պետական վերահսկողությունն ուժեղացնելու և «ԱԲ միլիարդատերերին սանձելու» խոստումների վրա։ Հաղթած դեմոկրատ թեկնածուներն արդեն հայտարարել են տեխնոլոգիական բիզնեսի խոշոր ներկայացուցիչների, այդ թվում՝ Իլոն Մասկի գործունեությունը հետաքննելու և նրանց երդմամբ ցուցմունքներ տալու համար Կոնգրես հրավիրելու մտադրության մասին։ Ինչպես նշում է FT-ն, Սիլիկոնյան հովտի էլիտաներից հեռանալու կոչեր են հնչում նաև հանրապետականների որոշ աջակիցների շրջանում, որոնք պահանջում են «վճռական գործողություններ» ԱԲ-ի չկարգավորվող զարգացման դեմ։
Պարբերականի փոխանցմամբ՝ տեխնոլոգիական ընկերություններն այժմ փորձում են կարգավորել հարաբերությունները դեմոկրատների և հասարակության հետ։ FT-ի տվյալներով՝ Meta-ն և Palantir-ը լոբբիստական աշխատանքներում ներգրավելու համար ընտրում են Դեմոկրատական կուսակցության հետ կապեր ունեցող անձանց։ Իր հերթին՝ OpenAI-ն սկսել է ավելի հաճախ հայտարարել ոլորտի համար ավելի խիստ կանոնների սահմանմանը աջակցելու պատրաստակամության մասին։ Որոշ կորպորացիաներ նաև խոստանում են ֆինանսավորել սոցիալական և բնապահպանական ծրագրեր։
Արհեստական բանականության կարգավորման շուրջ քննարկումներն ընդգրկում են տեխնոլոգիաների անվտանգությանը, տվյալների պաշտպանությանը և համակարգերի աշխատանքի համար մշակողների պատասխանատվությանը վերաբերող հարցեր։ Տվյալների կենտրոնների ցանցի ընդլայնումը լրացուցիչ խնդիրներ է առաջացնում էներգասպառման և տեղական ենթակառուցվածքների ծանրաբեռնվածության առումով։ ԱՄՆ-ում ոլորտի կարգավորումները կարող են սահմանվել ինչպես դաշնային մակարդակով, այնպես էլ առանձին նահանգների իշխանությունների կողմից, ուստի ընկերությունների համար կարևոր են թե քաղաքական որոշումները, թե ընտրողների դիրքորոշումը։ Բիզնեսը հաճախ մասնակցում է ապագա կարգավորումների շուրջ քննարկումներին՝ լոբբիստների և հրապարակային հայտարարությունների միջոցով։
Միևնույն ժամանակ, արհեստական բանականության նկատմամբ վերաբերմունքը նախընտրական օրակարգի բազմաթիվ հարցերից միայն մեկն է։ FT-ի հրապարակումը չի պնդում, որ այն քվեարկության արդյունքների միակ պատճառն է եղել։
Տեխնոլոգիական հրապարակումներն իրականացվում են Իդրամի աջակցությամբ։