Թրամփը UFC-ի ղեկավար Դեյնա Ուայթին առաջարկել է դառնալ Սպիտակ տան մամուլի քարտուղար (ՖՈՏՈ)

ԵՐԵՎԱՆ, 8 նոյեմբերի․ /Նովոստի-Արմենիա/․ ԱՄՆ նախագահ Դոնալդ Թրամփը շաբաթ օրը Truth Social սոցիալական ցանցում UFC-ի ղեկավար, խառը մենամարտերի (MMA) պրոմոտեր Դեյնա Ուայթին առաջարկել է ստանձնել Սպիտակ տան մամուլի քարտուղարի պաշտոնը, գրում է bbc-ին։

«Դանան կլինի այնպիսի մամուլի քարտուղար, ինչպիսին նախկինում երբեք չի եղել։ Դանա, խնդրում եմ, ստանձնի՛ր այս աշխատանքը», – գրել է Թրամփը։

Գրառումից պարզ չէր՝ առաջարկը լո՞ւրջ է, թե՞ կատակ։ BBC-ն մեկնաբանության համար դիմել է Սպիտակ տուն և UFC-ի սեփականատեր TKO Holdings ընկերություն։ Սպիտակ տան մամուլի քարտուղարի պաշտոնը թափուր է հոկտեմբերի կեսերից՝ Քեթի Զաքարիայի աղմկոտ հրաժարականից հետո, որն այդ պաշտոնում աշխատել էր ընդամենը մեկ շաբաթ։

Թրամփի գրառմանը նախորդել էր Կոնգրեսի միջանկյալ ընտրություններում Հանրապետական կուսակցության պարտությունը, որի հետևանքով հանրապետականները կորցրել էին վերահսկողությունը Կոնգրեսի երկու պալատների նկատմամբ։

ԱՄՆ նախագահն Ուայթին անվանել է «կատաղի մարտիկ և զինվոր»՝ հետաքրքրվելով, թե արդյոք նա կարող է աշխատանքի ներգրավել UFC-ի հայտնի մարտիկներից մի քանիսին, այդ թվում՝ ռուսաստանցիներ Իսլամ Մախաչևին և Հաբիբ Նուրմագոմեդովին։

«Մեզ պետք են այս մարդիկ՝ խելագար ձախերից պաշտպանվելու համար», – գրել է Թրամփը՝ հրապարակելով UFC-ի մարտիկների լուսանկարները։

Ուայթի պատասխանը առաջարկին

Շաբաթ օրը Լոնդոնում կայացած բռնցքամարտի մրցաշարից հետո Ուայթը լրագրողներին հայտնել է, որ երկուշաբթի Սպիտակ տանը հանդիպելու է Թրամփի հետ։

«Ես առանց այն էլ շատ անելիքներ ունեմ։ Վստահ եմ՝ քննարկելու բան կունենանք», – ասել է նա՝ չհստակեցնելով՝ արդյոք հետաքրքրված է առաջարկով։

CNN-ը, հղում անելով իրազեկ աղբյուրին, հաղորդել է, որ Ուայթը մերժել է առաջարկը, իսկ Թրամփի օգնականներից մեկն այն կատակ է անվանել։

Reuters-ն էլ հիշեցնում է, որ Սպիտակ տան հաղորդակցության գծով տնօրեն Սթիվեն Չունը նախկինում՝ 2013–2016 թվականներին, աշխատել է UFC-ում։