Հայաստանում հարցվածների կեսից ավելին դրական է գնահատել Ամուլսարի ոսկու հանքի գործարկումը: Այս մասին հայտնել է MPG խորհրդատվական ընկերության ղեկավար Արամ Նավասարդյանը՝ ներկայացնելով MPG խորհրդատվական ընկերության «Շաքի-Շուկի, Պաշ Կիմ Յան» հարցման արդյունքները:
Նրա խոսքով՝ հարցվածների 30.6%-ը բացարձակապես դրական է արտահայտվել հանքի գործարկման վերաբերյալ, ևս 21.8%-ը՝ մասամբ դրական, 9.4%-ը՝ մասամբ բացասական, 20.6%-ը՝ բացարձակապես բացասական, իսկ 17.7%-ը՝ դեռևս չի որոշել:
Հիշեցնենք, որ Ամուլսարի հանքը գործարկվել է հոկտեմբերի 10-ին: Փաշինյանը, հանքը գործարկելիս, հայտարարել է, որ Ամուլսարի ոսկու հանքը տարեկան կարտադրի մոտավորապես 210,000 ունցիա ոսկի: Նշվում է, որ հանքի շահագործումը կհանգեցնի նրան, որ «Լիդիան Արմենիան» տարեկան պետական բյուջե կվճարի մոտ 130 միլիոն դոլարի հարկեր և հոնորարներ, ինչը դրական ազդեցություն կունենա Հայաստանի ՀՆԱ-ի վրա՝ 1.5-2%-ով։
Ամուլսարի նախագիծը, ենթադրաբար, կստեղծի ավելի քան 4000 ուղղակի և անուղղակի աշխատատեղ։ Կառավարության, «Լիդիան Արմենիայի» և Ջերմուկի, Վայքի և Սիսիանի համայնքների միջև կնքված համայնքային զարգացման համաձայնագրի համաձայն, հանքի ողջ կյանքի ընթացքում նախատեսվում է տարեկան 7-9 միլիոն դոլար հատկացնել համայնքների սոցիալ-տնտեսական զարգացման ծրագրերի համար։ Նախագիծն իրականացվում է «Լիդիան Արմենիայի» և ՀՀ կառավարության միջև ռազմավարական համագործակցության շրջանակներում։ Ընկերությունը նախագծում ներդրել է մոտ 750 միլիոն դոլար, որից 150 միլիոն դոլարը ապահովվել է ՀՀ կառավարության կողմից տրված պետական երաշխիքով։ Բնապահպանները քննադատեցին ՀՀ կառավարության որոշումը՝ ընդգծելով, որ հանքի շահագործումը անդառնալի վնաս կպատճառի Ջերմուկ հանգստավայրին և Սևանա լճին։
Հարցումն անցկացվել է ՀՀ բնակիչների հետ հեռախոսազանգերի միջոցով այս տարվա հոկտեմբերի 28-ից նոյեմբերի 4-ը։ Ընտրանքի չափը կազմել է 1001 մարդ՝ +/- 3% սխալի միջակայքով։
2011 թվականին MPG-ն դարձավ Gallup International Association-ի պաշտոնական ներկայացուցիչը Հայաստանում, որը աշխարհի ամենահեղինակավոր և անկախ հասարակական կարծիքի հետազոտական կազմակերպություններից մեկն է։ 2003 թվականից ի վեր MPG-ն, գործելով սոցիոլոգիական և մարքեթինգային հետազոտությունների շուկայում, իրականացրել է տարբեր չափերի ավելի քան 800 նախագիծ։