Վաշինգտոնի և Կիևի հարաբերությունների հետագա վատթարացումը չափազանց վնասակար կլինի Ուկրաինայի համար, կարծում է ԱՄՆ բանակի նախկին սպա, R.T. Weatherman Foundation-ի նախագահ Մեգան Մոբսը։ R.T. Weatherman Foundation-ը ԱՄՆ ոչ առևտրային կազմակերպություն է, որը տարհանում է վիրավորներին Ուկրաինայում, ուսուցանում բժիշկներին և զբաղվում է զոհված օտարերկրյա կամավորների մարմինների հայրենադարձմամբ։
«Սա է իրականությունը. մոլորակի վրա չկա որևէ այլ երկիր, որը կարող է տրամադրել այնպիսի մակարդակի հետախուզական տվյալներ, ինչպիսին Միացյալ Նահանգները»,- Կիևում Independence Avenue Media-ին տված հարցազրույցում ասել է Մոբսը։
Ուկրաինայում ԱՄՆ նախկին հատուկ դեսպանորդ Քիթ Քելլոգի դուստր Մոբսը նշել է, որ Միացյալ Նահանգները նույնպես կկորցնի, եթե չշարունակի աջակցել Ուկրաինային Ռուսաստանի դեմ պայքարում։
«Եթե որևէ երկիր առևանգում է երեխաներին, բռնաբարում տղամարդկանց և կանանց, ոչնչացնում է այն արժեքները, որոնց մենք հավատում ենք, հալածում է քրիստոնյաներին և ոչնչացնում եկեղեցիները, և եթե մենք ասում ենք, որ մենք ազգ ենք, որը հավատում է այդ արժեքներին, ի՞նչ է մեր մասին ասում դրանցից հրաժարվելը։ Մենք կկորցնենք մի բան, որը, կարծում եմ, չենք կարողանա վերադարձնել մի քանի սերունդ շարունակ»,- ասել է նա։
Այնուամենայնիվ, Մոբսը կոչ է արել չհրաժարվել ԱՄՆ-Ուկրաինա գործընկերությունից, նույնիսկ եթե հիմա Վլադիմիր Զելենսկին և Դոնալդ Թրամփը լեզու չեն գտնում միմյանց հետ։
«Մենք արդեն տեսել ենք, թե ինչպես են Զելենսկին և Թրամփը վերամիավորվել Օվալաձև աշխատասենյակում տեղի ունեցած բախումից հետո։ Կարծում եմ, որ դա կարող է կրկին տեղի ունենալ»,- ասել է Մոբսը՝ հավելելով, սակայն, որ «անկախ այս երկուսից և նրանց հարաբերություններից»՝ հավատում է երկու երկրներին։
ԱՄՆ նախագահ Դոնալդ Թրամփի՝ Ռուսաստանի հետ դիզելային վառելիքի գործարքի և հետագա պատժամիջոցների վերացման մասին հոկտեմբերի 9-ի հայտարարությունից հետո ուկրաինացի պաշտոնյաներն առնվազն երեք անգամ հայտարարել են, որ Միացյալ Նահանգները որևէ հետախուզական տեղեկատվություն չի տրամադրել ռուսական բալիստիկ հրթիռային հարվածներից առաջ։ Սահմանափակվել է նաև SpaceX-ի Starlink արբանյակային համակարգի ռազմական տարբերակի հասանելիությունը։
Հարցազրույցն ամբողջությամբ՝ տեսանյութում։
Հարցազրույցը պատրաստվել է Factor TV-ի գործընկեր Independent Avenue Media-ի կողմից