ՆԳ նախարարի տեղակալ Արմեն Ղազարյանն ընդունել է Բուլղարիայի ՆԳՆ սահմանային ոստիկանության գլխավոր տնօրինության բարձր հանձնակատարին
ՆԳ նախարարի տեղակալ Արմեն Ղազարյանը հոկտեմբերի 29-ին ընդունել է Բուլղարիայի Հանրապետության ներքին գործերի նախարարության սահմանային ոստիկանության գլխավոր տնօրինության տնօրեն, բարձր հանձնակատար Անտոն Զլատանովին։
Արմեն Ղազարյանը բարձր է գնահատել երկու երկրների միջև ձևավորված գործընկերային հարաբերությունները՝ կարևորելով մասնավորապես ներքին գործերի ոլորտում երկկողմ համագործակցությունը։
ՆԳ նախարարի տեղակալն անդրադարձել է Հայաստանի՝ Եվրոպական միության հետ հարաբերությունների խորացման գործընթացին և ընդգծել այդ համատեքստում իրականացվող բարեփոխումների կարևորությունը։
Նա ներկայացրել է վիզաների ազատականացման գործընթացի, օրենսդրական և ինստիտուցիոնալ բարեփոխումների, ինչպես նաև ներքին գործերի համակարգի կարողությունների զարգացման ուղղությամբ տարվող աշխատանքները։
Արմեն Ղազարյանը ընդգծել է երկու երկրների միջև ռազմավարական գործընկերության շրջանակում համագործակցության խորացման, մասնագիտական փորձի փոխանակման և փոխադարձ հետաքրքրություն ներկայացնող ուղղություններով համատեղ աշխատանքների իրականացման կարևորությունը։
Բուլղարիայի Հանրապետության ներքին գործերի նախարարության սահմանային ոստիկանության գլխավոր տնօրինության տնօրեն, բարձր հանձնակատար Անտոն Զլատանովը շնորհակալություն է հայտնել ջերմ ընդունելության համար և ներկայացրել Բուլղարիայի՝ եվրոպական ինտեգրման ուղին, այդ գործընթացում իրականացված օրենսդրական և կառուցվածքային բարեփոխումները։
Անտոն Զլատանովն անդրադարձել է նաև սահմանային անվտանգության ապահովման, միգրացիոն հոսքերի կառավարման և անդրսահմանային կազմակերպված հանցավորության դեմ պայքարի ոլորտներում Բուլղարիայի փորձին։
Կողմերը քննարկել են սահմանների համալիր կառավարման, սահմանների վերահսկողության, սահմանային անցակետերի մեծ ծանրաբեռնվածության պայմաններում ծառայությունների արդյունավետ կազմակերպման, ինչպես նաև անդրազգային հանցավորության, թմրամիջոցների, զենքի և զինամթերքի ապօրինի շրջանառության կանխարգելմանն առնչվող հարցեր։
Անդրադարձ է կատարվել նաև սահմանային վերահսկողության տեխնիկական միջոցների արդիականացմանը, ծառայությունների գործունեության կազմակերպմանը, կառուցվածքային բարեփոխումներին և մասնագիտական կարողությունների կատարելագործմանը։
Կողմերը պայմանավորվածություն են ձեռք բերել ընդլայնելու երկկողմ համագործակցությունը։
ՀՀ ներքին գործերի նախարարություն
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: