«Մենք ասել ենք բազմիցս, որ սահմանադրության օրակարգը մեզ համար ներքին օրակարգ է, որը, իհարկե, կունենա նաև միջազգային և տարածաշրջանային որոշակի շատ կոնկրետ ազդեցություն։ Այսօր պարոն Միրզոյանը, իհարկե, առանց նախապես համաձայնեցնելու, հարցին տվեց մի փոքր միջազգային և տարածաշրջանային կոնտեքստ, և ընդդիմության ներկայացուցիչներն էլ հարցադրում արեցին, թե այ դուք երաշխավորո՞ւմ եք, որ դա ինչ-որ հանգրվանի վերջին կետն է։ Ես այսօրվա խոսակցությունը կընդունեմ ի գիտություն, որովհետև մինչև այս պահը ինձ համար թեման եղել է ներքին տրամաբանության մեջ։ Ես այս հարցը վերցնում եմ և ասում եմ, որ առաջիկայում կկենտրոնանամ այդ հարցի պատասխանը ձևակերպելու և չեմ բացառում այդ հարցի պատասխանից բխող առաջարկ անելու վրա, որից, իմ կարծիքով, եթե այդ առաջարկը ձևակերպվի, ընդդիմությունը չի կարող հրաժարվել»,- խորհրդարանում, ԱԺ-կառավարություն հարցուպատասխանի նիստում ասաց Նիկոլ Փաշինյանը։
«Հայաստան» խմբակցության պատգամավոր Աննա Գրիգորյանն էր հիշեցրել Նիկոլ Փաշինյանի հայտարարությունը, որ եթե ընտրություններում ՔՊ-ն սահմանադրական մեծամասնություն չստանա, ապա աղետաբեր պատերազմ կլինի, և նկատել, որ ՀՀ Սահմանադրության փոփոխության հարցը ՔՊ-ի համար նախընտրական օրակարգ է։
Աննա Գրիգորյանը հակադարձեց. «Ընդդիմությունը ոչ թե ձեր առաջարկից է հրաժարվում, այլ Ալիևի առաջարկից է հրաժարվում։ Ցավոք, դուք արդեն նույնականացել եք։ Ես անկեղծ, ուշադիր ձեզ լսում եմ և ինչքանով հասկացա, դուք ոչ թե ինձ էիք արձագանքում, այլ Արարատ Միրզոյանին՝ ասելով՝ ինչե՞ր ես առաջարկում առանց ինձ հետ համաձայնեցնելու։ Որովհետև լավ չհասկացա՝ ձեր պատասխանը ինչի մասին է։ Ակնհայտ է մի իրողություն, որ այս խորհրդարանը ձևավորվել է այն տեսքով, ինչպիսին որ կա։ Մենք ունենք մեր դժգոհությունները, դուք ունեք ձեր դժգոհությունները, բայց փաստ է, որ այս համամասնությունը ձևավորվել է նաև այն օրակարգով, որ դուք դրել եք։ Եվ այս ահաբեկումները դուք եք ասել, դուք եք մարդկանց ասել՝ եթե չստանանք սահմանադրական մեծամասնություն, լինելու է պատերազմ, պետք է փոխվի Սահմանադրությունը։ Դուք վերջերս ասում եք՝ իմ քաղաքական առաքելությունը ավարտված կհամարեմ, եթե չկարողանամ փոխել սահմանադրությունը։ Հունիսի 7-ին ձեր իսկ ասած առաքելությունն արդեն ավարտված է»,– ասաց Աննա Գրիգորյանը։
Փաշինյանն հեգնեց. «Այստեղ մնում էր ասել՝ ծափ, ծափ, ծափ։ Ես էլի ասում եմ հետևյալը, որ մենք պետք է կենտրոնանանք մեր կենսական խնդիրների լուծման վրա։
Ես ասել եմ, որ ընդդիմադիրները իրենց հարցադրումներով ապացուցեցին, որ եթե իրենք հանկարծ այս իրավիճակներում լինեին իշխանություն, պատերազմ կծագեր։ Այդ թվում՝ ձեր ասածն է պատճառը, որ ես կարծում եմ, որ եթե ընտրություններից առաջ կարող էինք ասել՝ հա, դե խաղաղության համաձայնագիր է, նախաստորագրվել է, երբ լինի՝ կստորագրենք։ Մենք մեր բոլոր ջանքերը պետք է կենտրոնացնենք խաղաղության համաձայնագիրը ստորագրելու վրա»։
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: