«Դուք նշեցիք, որ այս համաձայնագրով դետալիզացվում են առաջնորդների մակարդակով ձեռք բերված պայմանավորվածությունները։ Հիշեցնեմ, որ կարևոր պայմանավորվածությունն այն էր, որ Հայաստանի տարածքով Ադրբեջանին տրամադրվում է անխոչընդոտ կապ, և դրա դիմաց Հայաստանը ստանում է փոխադարձ առավելություններ։ Խնդրում եմ՝ կնշե՞ք այն փաստաթուղթը, որտեղ նույնքան դետալացված նշվում են Ադրբեջանի պարտավորությունները»,- ԱԺ նստաշրջանում Հայաստանի Հանրապետության և Ամերիկայի Միացյալ Նահանգների միջև «Թրամփի ուղի՝ հանուն միջազգային խաղաղության և բարգավաճման» նախագծի (ԹՐԻՓՓ) վերաբերյալ ռազմավարական համագործակցության մասին շրջանակային համաձայնագիրը վավերացնելու մասին նախագծի քննարկման ժամանակ ՀՀ արտաքին գործերի և միջազգային առևտրի նախարար Արարատ Միրզոյանին հարցրեց «Հայաստան» խմբակցության պատգամավոր Քրիստինե Վարդանյանը։
Արարատ Միրզոյանն ի պատասխան ասաց․ «Ես առաջարկում եմ՝ նայեք մի հատ մեգա մակարդակը, այսինքն՝ Հայաստանի Հանրապետությունն Ադրբեջանի տարածքով և ենթակառուցվածքներով կապվելու է երրորդ երկրների հետ։ Երկրորդը, ՀՀ-ն կապվելու է Ադրբեջանի հետ, ե եթե երկաթուղու մասին ենք խոսում, ՀՀ-ն կապելու է իր հյուսիսն ու հարավը։ Հիմա այդ բոլորն անկասկած գրված, օգոստոսի 2-ից հետո որևէ կասկածի և խոչընդոտի չհանդիպող բաներ են»։
Մանրամասները՝ տեսանյութում
Արարատ Միրզոյանը հավելեց․ «Ավելին ասեմ, այսօր ՀՀ-ն Ադրբեջանի տարածքն ու ենթակառուցվածքներն օգտագործում է։ Հայաստան բեռներ են գալիս և ՀՀ-ից բեռներ են գնում Ադրբեջանի տարածքով, ժողովուրդ ջան։ Հետևաբար, երբ մենք կասկածի տակ ենք դնում այն գաղափարը, որ մենք կարող ենք օգտագործել իրենց տարածքը, այնքան ժամանակավրեպ է։ Համաձայնագիրը Հայաստանի և ԱՄՆ միջև է, ո՞նց կարող էին այդտեղ և Հայաստանը, և ԱՄՆ-ն գրել, որ երրորդ երկիրը երրորդ երկրի տարածքում ինչ-որ պարտավորություն պետք է ստանձնի»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: