Anthropic-ը, որը հայտնի է մեծ լեզվային մոդելների ընտանիքի և Claude արհեստական բանականության օգնականների մշակմամբ, Nasdaq բորսայում բաժնետոմսերի առաջնային հրապարակային տեղաբաշխում (IPO) իրականացնելու պաշտոնական հայտ է ներկայացրել, հայտնում է ընկերության կայքը։ Թողարկողը նախատեսում է A դասի սովորական բաժնետոմսերը ցուցակել Nasdaq Global Select Market հարթակում՝ ANT բորսայական կոդով։
Գրանցման փաստաթղթերն արդեն ներկայացվել են ԱՄՆ արժեթղթերի և բորսաների հանձնաժողով, սակայն այս պահին հայտը դեռ ուժի մեջ չի մտել։ Բաժնետոմսերի տեղաբաշխման գործընթացը կիրականացվի բացառապես պաշտոնական թողարկման ազդագրի միջոցով։
Bloomberg գործակալության տվյալներով՝ բորսա դուրս գալուց առաջ ընկերության եռամսյակային հասույթն աճել է 50%-ով, իսկ ճշգրտված համախառն շահութաբերության ցուցանիշը կազմել է 85%։
Այս քայլը կարող է Anthropic-ին հնարավորություն տալ ավելի շուտ դուրս գալ հրապարակային շուկա, քան նրա հիմնական մրցակից OpenAI-ը, որը բորսա դուրս գալու ժամկետը հետաձգել է մինչև 2027 թվականը։ OpenAI-ի ղեկավարությունն այս որոշումը բացատրել է արհեստական բանականության տեխնոլոգիաների անվտանգության հարցերին ավելի մեծ ուշադրություն դարձնելու անհրաժեշտությամբ, մինչդեռ Anthropic-ն արդեն ցուցադրում է 11%-ը գերազանցող գործառնական շահութաբերություն։
Տեխնոլոգիական հրապարակումներն իրականացվում են Իդրամի աջակցությամբ։