Ամբողջական հացահատիկից պատրաստված հացը, պահածոյացված լոբին, նախաճաշի շիլաները և մածունը կարող են նվազեցնել հաստ աղիքի քաղցկեղի առաջացման ռիսկը, չնայած այն հանգամանքին, որ դրանք գերմշակված սնունդ են: Այս եզրակացությանը հանգել են ԱՄՆ Ազգային քաղցկեղի ինստիտուտի հետազոտողները՝ ավելի քան 461,000 մարդու տվյալներ ուսումնասիրելուց հետո: Արդյունքները հրապարակվել են PLOS Medicine ամսագրում:
Հետազոտողները մասնակիցներին հետևել են 18 տարի, որի ընթացքում ախտորոշվել է հաստ աղիքի քաղցկեղի 10,075 դեպք: Ընդհանուր առմամբ, ավելի շատ գերմշակված սնունդ օգտագործող մարդկանց մոտ ռիսկի զգալի աճ չի նկատվել: Այնուամենայնիվ, արդյունքները տարբերվել են՝ կախված սննդի տեսակից:
Ամբողջահատիկից պատրաստված հացի օրական լրացուցիչ չափաբաժինը կապված է հաստ աղիքի քաղցկեղի առաջացման ռիսկի 13%-ով նվազման հետ: Ավելի ուժեղ կապ է նկատվել մանրաթելի հետ. վերամշակված սննդամթերքից, ինչպիսիք են պահածոյացված լոբին, օրական յուրաքանչյուր լրացուցիչ 10 գրամը կապված է ռիսկի 28%-ով նվազման հետ: Որոշակի կաթնամթերքի, այդ թվում՝ քաղցրացված մածունների և կաթնաշոռերի լրացուցիչ չափաբաժինը կապված է ռիսկի 25%-ով նվազման հետ:
Սակայն մսամթերքը հակառակ կապը է ցույց տվել։ Վերամշակված մսի, օրինակ՝ բեկոնի, յուրաքանչյուր լրացուցիչ օրական չափաբաժինը կապված էր ռիսկի 8%-ով աճի հետ։ Հետազոտողները պարզաբանեցին, որ ոչ գերմշակված մսի դեպքում աճը կազմել է 4%։
Հեղինակները ենթադրում են, որ որոշ վերամշակված սննդամթերքներ կարող են օգտակար լինել իրենց մանրաթելերի և այլ սննդանյութերի պարունակության շնորհիվ։ Մանրաթելը նպաստում է աղիքների նորմալ գործունեությանը և կապված է հաստ աղիքի քաղցկեղի ավելի ցածր ռիսկի հետ։
Հետազոտողները ընդգծում են, որ արդյունքները չեն ապացուցում պատճառահետևանքային կապը։ Ուսումնասիրությունը ներառել է 50-ից 71 տարեկան ամերիկացիների, ուստի արդյունքները չեն կարող ավտոմատ կերպով ընդհանրացվել երիտասարդների կամ ընդհանուր բնակչության վրա։