Իլոն Մասկը, աշխատելով Դոնալդ Թրամփի թիմում, եզրակացություն է արել ամերիկյան տնտեսության ապագայի վերաբերյալ։ ԱՄՆ պետական պարտքի իրավիճակի մասին իր տեսակետը ձեռնարկատերը ներկայացրել է լրագրող և գրող Ուոլթեր Այզեքսոնի հետ The Builders փոդքասթի շրջանակում ունեցած զրույցում։
Գործարարը հայտարարել է, որ պետական պարտավորությունների աճի դեմ պայքարի ավանդական մեթոդներն այլևս չեն գործում։ Նրա կարծիքով՝ միակ արդյունավետ լուծումը տեխնոլոգիական ոլորտում է։
«Ես եկել եմ այն եզրակացության, որ պետական պարտքի մեր խնդիրը լուծելու միակ միջոցը արհեստական բանականությունն ու ռոբոտներն են», – ընդգծել է Մասկը։
Միլիարդատերը բացատրել է, թե ինչու է ծախսերի սովորական կրճատումը համարում փակուղային ճանապարհ։ Նա համոզված է, որ ԱՄՆ իշխանությունները պատրաստ չեն դադարեցնել թանկարժեք ծրագրերի իրականացումը։ Պատճառը պարզ է․ նման քայլերն անմիջապես դժգոհության ալիք են առաջացնում և ավելացնում քաղաքական հակառակորդների թիվը։
Զրույցի ընթացքում Մասկը գնահատել է նաև գործող նախագահի հնարավորությունները այս հարցում։ Նրա կարծիքով՝ Դոնալդ Թրամփը տեսականորեն կարող էր փոխել ստեղծված միտումը, եթե բյուջեի պակասուրդի դեմ պայքարը դարձներ իր առաջնահերթությունը։ Սակայն, ինչպես կարծում է ձեռնարկատերը, ԱՄՆ նախագահը խուսափում է ոչ ժողովրդական որոշումներից՝ ձգտելով լավ հարաբերություններ պահպանել շրջապատի հետ։