Ադրբեջանի և Հայաստանի միջև խաղաղության հաստատումը նոր հեռանկարներ է ստեղծում Արևելքի և Արևմուտքի միջև կապերի զարգացման ու ամրապնդման համար։ Այս մասին Բաքվում ընթացող Ասիայում փոխգործակցության և վստահության միջոցների հարցերով խորհրդաժողովի (ԱՓՎՄԽ/CICA) 7-րդ գագաթնաժողովի լիագումար նիստում հայտարարել է Ղազախստանի նախագահ Կասըմ-Ժոմարտ Տոկաևը, հայտնում են ադրբեջանական լրատվամիջոցները։
Ղազախստանի ղեկավարն իր ելույթում հատուկ ընդգծել է Երևանի և Բաքվի միջև ձևավորվող հաշտեցման գործընթացի կարևորությունը։ Նրա գնահատմամբ՝ տասնամյակներ տևած հակամարտությունից հետո երկու երկրների միջև արձանագրվող մերձեցումն ու երկխոսությունը լայն հնարավորություններ են բացում տարածաշրջանային անվտանգության ապահովման և միջազգային տրանսպորտային ու քաղաքական կապերի ընդլայնման համար։