Այո, դեմարշ է. Փաշինյանը` Բելառուս չմեկնելու մասին․ ՏԵՍԱՆՅՈՒԹ

ՀՀ վարչապետ Նիկոլ Փաշինյանը լրագրողների հետ ճեպազրույցի ժամանակ անդրադարՁԱՎ Բելառուս պաշտոնական պատվիրակություններ չուղարկելու որոշմանը, «սրտի օլիգարխներ» ունենալու մեղադրանքներին և իր աներորդու՝ ԱԺ նախկին պատգամավոր Հրաչյա Հակոբյանի հետ շփումներին։

Անդրադառնալով Բելառուսի հետ հարաբերություններին և միջազգային շփումներին՝ վարչապետն ընդգծեց, որ Հայաստանի քաղաքականությունը որոշվում է սեփական պետական շահերով։

«Ասել եմ՝ Բելառուս չենք գնալու, և մեր պատվիրակությունները պաշտոնական չեն գնալու։ Իմ հայտարարությունից հետո որևէ պաշտոնական պատվիրակություն չի գնացել։ Այո՛, դեմարշ է»,- հայտարարեց Նիկոլ Փաշինյանը։

Լրագրողի հարցին, թե արդյոք նրա աներորդի Հրաչյա Հակոբյանի շփումները տարբեր գործարարների հետ «կանաչ լույս» են վառում վերջիններիս համար, վարչապետը պատասխանեց, որ Հայաստանում որևէ մեկը որևէ մեկի հետ շփվելու մեջ կաշկանդված չէ։

«Ես սրտի օլիգարխ չունեմ ընդհանրապես․ ո՞ւր են իմ միլիոնները։ Մարդիկ հայտարարագիր են լրացնում, եթե հայտարարագրից շեղվող բան կլինի, կենթարկվեն քրեական պատասխանատվության՝ ով ուզում է լինի»,- նշեց նա։

Վարչապետը նաև հավելեց, որ զրպարտչական հայտարարությունների դեպքում դիմելու է դատարան և պահանջելու է դրամական փոխհատուցում։

Մանրամասները՝ տեսանյութում։

Եվգենյա Համբարձումյան